South Garo Hills a·jani dingtangmanchagipa daka rikaniko ripingchina Assembly Speaker didia
BAGHMARA: South Garo Hills a·jani Baghmara jillao salgnina ong·atenggipa Tyisam Festival-ko Budbar salo, Meghalaya Legislative Assembly-ni Speaker Thomas A Sangma, Simsang chisamo a·bachengate on·angaha aro ia festival-ko a·bachengatanio, a·dokni Education Minister aro Siju-Rongara Constituency-ni MLA Rakkam A Sangma-ba dongpae bak ra·angaha.
Ia Tyisam Festival-ko do·ga oe on·anganio Assembly-ni Speaker, jinmana aganprakangengon, ia Tyisam Festival-ko ong·ataniara Tourism-ni gitasan nangchongmota ong·ja indiba Garo Hills-ni ia jolrango donggipa manderangni daka rikanirang namen dingtanggipa ong·ani gimin ian jatni daka rikanirangko ripinge rakkina gitaba namen nangchongmotgipa ong·a ine parakangaha.
“Anga an·tangba South Garo Hills a·jaonin ong·genchimoba da·alsa skanggipa changna Chugan aro Ruga chrokaniko name nie ra·pana cholko man·aha,” ine Sangma aganaha.
An·tangtangni daka rikani, ku·aganani, chrok mesaani, ring·ani aro uandakgipa dingtang dingtang daka rikanirangko ripinge rakkiangkuchina gitaba jolni manderangko aro mongsongbate chadamberangko Sangma didiangaha.
Ia tom·anio a·dokni Education Minister Rakkam A Sangma-ba jinmana aganprakangengon, janggi tangani cholrangko tarina aro jolo namroro silroroaniko ra·bana gitade Tourism-ko namdapatchengna nangchongmota ine aganangaha.
Mikkangchide South Garo Hills a·jaoba rama jal·langrang nambatgnok aro ian a·jana namroro silroroaniko ra·bana chol ong·gnok ineba Rakkam aganaha.
Dingtang dingtang scheme-rangko ra·gate on·anichi Tourism-o chadamberangna dingtang dingtang janggi tangani cholrangko on·ahani gimin ua dingtangmancha a·dokni Chief Minister Conrad K Sangma-koba mittelpilangaha.
Ia bilsini Tyisam festival-o joltangni cha·ani ringanirang, jatni kal·susaanirang, chroksusaani, git ring·susaani, Beach volleyball, Flower show aro uandakgipa program-rangko ong·atenga.
Ia Tyisam festival-ko da·al Bristibar attamo, dingtangmancha Rock Concert-ko ong·atanichi matchotatgen aro ia concert-o gitrangko ring·e mesokangna sienggipa dolrangara, Rough Road, Nokpante, Ahowee, Enosh aro gipinrang ong·enga.