Tura: GNLA-ni gitcham chairman aro Songsak Block Congress committee-ni dilgipa saksa executive memborrang baksa mijalo BJP-o bakrimeaha indake Garo Hills-o BJP-ni bilko bilakdapatna dakchakbeani ong·gnok.
Champion, batanggimin Assembly election-o, AITC-ni Mukul Sangma aro changgnina MLA ong·gipa NPP-ni Nihim D Shira mang baksa Songsak Constituency-o Congress tikito susaahachim, jean gittamgipa ong·rikaha.
BJP-ni koboro parakatani gitade, state president, Rikman G Momin, vice president, Bernard Marak aro gipinrangni dongpaanio Champion, da·al BJP-o bakrimeaha. Party-o rimchaksoani tom·aniko C&C hotel, Burny Hills locality, Turao ong·ataha.
Indake ong·engon, election-na skang gipin dilgiparang aro worker-rangba party-o napna tarie dongtokenga ineba party koboro parakkuaha.
