SHILLONG: North Eastern Indira Gandhi Regional Institute of Health & Medical Sciences (NEIGRIHMS)-o a·dokni reservation policy aro porikkani niamrangko ja·rikjaenga ine matnanganiko NEIGRIHMS-ni Director Dr Nalin Mehta jegalataha.
Dr Mehta-ni parakatani gitade, NEIGRIHMS-ara ma·mong sorkarini hospital-sa ong·ani gimin job reservation ba kamna biap kanganioba Indian Constitution-ni dongimin niamrangko ja·rikgipa institute-sa ong·achim.
“Anga an·tangde kamna biap kanganio maming bilrang dongja maina ian ma·mong sorkarini institute aro hospital-sa ong·ani gimin chinga Constitution-ni dongimin niamrangkosa ja·rikna nangao ga·aka,” ine Dr Mehta aganaha.
NEIGRIHMS-o SC, ST, OBC, Persons with Disabilities, general category aro pilak gadangrangnan Constitution-ni dongimin reservation policy-kosa ja·rikna nanga ine talataniko on·angengon, Constitution-ni dongimin percentage-ko maming dakeba ia institute pe·na bil dongja ine NEIGRIHMS-ni Director parakataha.
Indake ong·genchimoba Scheduled Tribe (ST) candidate-rang, porikkarango name dakgenchimode, reserved quota baksana general seat-rangkoba man·ani cholrang donge, seat-rangko bang·bate man·aigen ine Dr Mehta talataniko on·angaha.
“Basakobarangde ST-rangna dongimin biapna baten candidate-rang bang·bata maina uamangoni mitamrangde general category-ni seat-rangkoba man·na gita porikkarango name daka. Indiba anga ST, SC ba OBC-ni seat percentage-ko bariatna man·ja,” ine Dr Mehta aganaha.
Director-ni talatani gitade, NEIGRIHMS-o an·tangaride porikkarangko ong·atna bilba dongja aro batanggimin somoirango lekkarangchi porikkarangko ra·genchimoba da·ode computer-chisa porikkarangko ra·na nangengaha.
NEIGRIHMS-o reservation policy-ko dingtangatna nangenggipa manderangde ba dolrangde, Health Ministry-na seachi u·iatna ba dabina man·gen ineba Dr Mehta parakataha.
Iani bidingo mitam dolrangni NEIGRIHMS-ko ka·mikkenatpilengani gimin an·tangni suk ong·gijaniko parakatengon, ia institute aro institute-o kam ka·enggipa manderang, a·dokni namgninan kamko ka·enga ine maiba nangnikani ba neng·nikanirang donggenchimode nama bewalosa agangrikechina gita Dr Mehta mol·molataha.
