WILLIAMNAGAR: Adita salrangna skang, East Garo Hills a·jani Asiragre songo, nikronggijagipa ostro ge·sako parachute baksa nikani ja·man songni manderangni gisepo adita kenjagokani ong·kataha indiba ja·mano police-rang, ia ostroni bidingo name am·sandie nion, ia ostrora balwa ta·rakaniko tona jakkalgipa PS-20 GPS sonde ostrosachim ine ma·sina man·aha.
East Garo Hills a·jani SP SA Rynjah-ni u·iatani gitade, Williamnagar Police Station-ni ning·o donggipa Asiragre songo, ma·sina man·gijagipa bostu ge·sako nikaha ine January 30 tarik walni 9:00 bajimango, Bolkinggre songo donggipa police-rangni anti-insurgent operation camp-o koborko man·soaha.
Koborko man·soani ja·man police-rang, BDDS dol baksa Asiragre songona re·ange sing·sandion, January-ni 29 tarik attam 6:30 bajimango, Asiragre songni Silnang R Marak minggipa mande saksa, “meteomodem PS-20 made in France” ine sea donggipa ostroko ia ostro baksa kachapgipa gitchak rongni parachute-ko an·tangni baganoniko nike, noktango donaha ine ma·sina man·aha.
Ia ostroko ja·mano police-rang, OGC-ona ra·angenba name am·sandie nion, ia bostuara balwa ta·rakaniko togipa GPS sonde ostrosa ong·achim ine ma·sina man·aha.
