SHILLONG: Ia bilsio ong·atna sienggipa Lok Sabha election-na pilak dolrangan tarisamsotokengahaon, Garo Hills-o bang·a manderangan Congress dolkode ‘dal·e’ ra·tokjaengaha ine National People’s Party (NPP)-ni dilgipa aro a·dokni Education Minister Rakkam A Sangma parakataha.
Tura Parliamentary constituency-o NPP-ni candidate Agatha K Sangma baksa susana gita Congress dolni tikitko Gambegre-ni MLA Saleng A Sangma on·na tik ka·ahachim ine nikna man·enga.
Tura Lok Sabha constituency-o susana gita Congress dolni tikitko man·ahani gimin Saleng-na an·tangni namgipa skaniko parakatengon, indita bakkandikbegipa somoio ua baditana kingking Garo Hills-o manderangko salna man·gen ua ma·sija ine Rakkam aganaha.
Lok Sabha election-o susaaniara Saleng-na skangoni niksamsoenggipa jumangan ong·enggen ine janapatengon, election-ode darangkoba mikchepna man·ja ine Rakkam aganskaaha.
“Garo Hills-ode bang·a manderangan Congress dolko dal·e ra·tokjaha indiba election-ode darangkoba mikchepna man·ja maina election-de election-an ong·aia aro jeba ong·na amaia. Indiba batanggimin jarango angni unbaksa (Saleng) election-ni gimin golpogrikode ua ia election-o susajawa inesa aganahachim. Jeba ong·china Congress dolni candidate-na uko seokahani gimin anga una namgipa skaniko on·enga,” ine Siju-Rongara constituency-ni NPP MLA aganaha.
Tura Parliamentary constituency-na Gambegre-ni MLA Saleng Sangma-ko aro Shillong Parliamentary constituency-na da·o ong·enggipa Shillong-ni MP Vincent Pala-ko candidate dake, re·anggipa Sombar salosan All India Congress Committee (AICC)-ni songe on·gipa screening committee ra·chakangahachim.
Tura Lok Sabha constituency-na Congress aro NPP dolrang, an·tangtangni candidate-rangko seokmanahaoba TMC aro BJP dolrangde da·onan candidate-ko tik ka·skakujaengachim.
