SHILLONG: Hynniewtrep Youth Council (HYC)-ni dabienggipa dingtang dingtang kamrangni bidingo, North Eastern Indira Gandhi Regional Institute of Health & Medical Sciences (NEIGRIHMS)-ni Director Prof Nalin Mehta baksa tom·e agangrikengmiting somoio dolgnini gisepo ma·sisretgrikanichi adita ding·chaogrike jegrikanirang ong·kataha indiba ja·mano NEIGRIHMS-ni Director an·tangan, an·tangni kamna suk ong·jae, HYC-ni membor-rango kema bi·pilskaaha.
NEIGRIHMS-o nursing officer-rangko NORCET gita kamo ra·na tik ka·anichi joltangni chadamberang aro institute-o kam ka·enggipa Tribal nurse-rangna nangchakeaniko ra·baengaha ine HYC-ni dilgiparang parakatenba, nursing officer-rangko NEIGRIHMS gitan ra·china aro NORCET gita ra·na tik ka·aniko ra·galpilchina dabiengachim ine nikna man·a.
NEIGRIHMS-o kraa somoirangna contract basis-o rakkia man·gipa pilak nurse-rangko kamo ra·kamna gita one-time policy-ko ra·gatchina gitaba HYC dabiengachim.
Una agreba, Group B aro C gadangni ning·o donggipa kamrangna 80 percent-kode a·doktangni Tribal chadamberangnan kange donchina gita HYC dabiengachim.
Iani bidingo HYC-ni membor-rang, Budbar salo, NEIGRIHMS-ni Director-ko gronge agangrikengachim indiba HYC-ni membor-rang, Director-ni agangipa kattarangna suk ong·jae, tom·aoni ong·katgrime kattokaha.
Iani ja·man, HYC-ni president Roy Kupar Kharjahrin aro gipin membor-rang, NEIGRIHMS-o kam ka·enggipa pilak manderangkon ra·galna aro hospital-ni gate-rangko chipe donna ka·mikkenataniko on·angaha aro ja·mano magistrate saksa re·baenba, dolgnini gisepo ding·chaogrike jegrikaniko namateaha aro NEIGRIHMS-ni Director-ba an·tangni agangimin kattarangko ra·pile, HYC-ni membor-rango kemako bi·aha.
Dolgnini gisepo ding·chaogrike nampilani ja·man, apsan asonge agangriktaina gita Prof Mehta aganon, HYC-ni membor-rang gipin salo tom·aniko ong·atskachina Director-ko aganangaha.
