SHILLONG: GHADC-o tangka paisa jakkalsreta ine matnanganiko sandirokenggipa Lokayukta official-rangko ra·galani bidingo agangrikna gita a·dok sorkari, Voice of the People’s Party (VPP)-ni dilgiparangko okamataha.
“Iani bidingo jeba je somoioba re·bae ching baksa agangrikena man·aigen aro ango iani gimin maming champenganirang dongjawa,” ine Budbar salo, a·dokni Chief Minister Conrad K Sangma aganaha.
Kamoniko ra·gala man·gipa Lokayukta official-rangko kamo ra·pilchina dabie adita salrangna skangsan VPP-ni dilgiparang, asonge jingjengatahachim indiba iani bidingo a·dok sorkari, VPP-ni dilgiparang baksa agangrikna ku·rachakaniko on·ahani gimin VPP-ni dilgiparang, jingjengataniko dontongatpilahachim.
Reservation Policy-ko nipilna gita expert committee-ko songgipani bidingo sing·anina aganchakaniko on·angskaengon, ian jakgitelgipa committee-sa ong·e uamangni kamo sorkari jak on·pana bil dongja indiba ia committee, baditaba changna tom·e kamrangko ka·enga ine Chief Minister parakataha.
VPP aro dingtang dingtang dolrangni dabienga gita Meghalaya State Reservation Policy-ko gital dake nipilna re·anggipa bilsion a·dok sorkari, dingtangmancha expert committee-ko songe donangahachim ine nikna man·a.
Hynniewtrep National Liberation Council (HNLC) bobil dolko tom·tomaona rimbapilna gita sorkari baksa agangrikani bidingo janapatskaengon, sorkari baksa agangrikaniko dakangkuchina a·dok sorkari, HNLC bobil dolko didiataha indiba bobil dolrang baksa agangrikanio sorkarini dongimin niamrangba gnang ine Chief Minister parakataha.
“Da·o chinga niamrangko dingtangatgenchimode sorkarini pilak bobil dolrangna dongimin niamrangko dingtangatani gita ong·gnok maina niamrangkode skatang dingtangatna man·ja,” ine Sangma aganaha.
HNLC bobil dolni case-rangko sorkari kema ka·genma ine sing·anina aganchakengon, iani bidingo sorkari chanchirimanaha indiba mitam case-rangde ka·namgijagipa obostani case-rangsa ong·ani gimin pilak case-rangkon nigrikchengna nanggen ine Chief Minister aganaha.
Indake ong·genchimoba HNLC bobil dol baksa agangrikaniko a·dok sorkari chu·sokgipa ong·atna nangnikengani gimin HNLC bobil dolni dilgiparangko re·mikkangbachina nangnikenga ine ua aganaha.
