SHILLONG: February 16 tarikoni a·bachengatenggipa Budget session-ni somoio, a·dokni dingtang dingtang nangchongmotgipa kamrangni bidingo apsan ku·rang on·na man·na gita a·dokni opposition dolskarang, chong·motan Trinamool Congress (TMC) aro Voice of the People’s Party (VPP) baksa agangrikgen ine Opposition Congress dolni dilgipa Ronnie V Lyngdoh parakataha.
Lyngdoh-ni kobor ra·timgiparangna parakatani gitade, Budget session-ni somoio a·dokni dingtang dingtang nanganirangna apsan ku·rang on·na man·na gita ua Sombar salo, TMC aro VPP dolrangna seatgen.
“A·dokni nanganirangna apsan ku·rang on·na man·na gita chinga apsan asonge agangrikna man·genchimode anga kusi ong·batgen. Assembly-ni budget session-o chinga apsan a·dokni nangchongmotgipa kamrangni gimin ku·rang on·genchimode uan a·dokna namgni ong·gen,” ine Lyngdoh aganaha.
Indake ong·genchimoba ian uni okamaniko opposition dolskarang, chong·motan TMC aro VPP dolrang ra·chakgenchimosa chu·sokgipa ong·aigen ine Congress dolni dilgipa aganskaaha.
“Congress Legislature Party-ni dilgipa ong·e aro Opposition dolni dilgipa ong·e, TMC aro VPP dolrangko ku·monganiara uni daitoan ong·a,” ineba Lyngdoh aganaha.
Meghalaya a·dokni sak 60 donggipa Assembly-o da·o dipet Congress, TMC aro VPP opposition dolrango gimik sak 14 membor-rang dongachim indiba ia dolrang, MDA sorkarini kosako apsan nangrime ku·rang on·ade changsaba dongskakujaengachim.
