SHILLONG: Khasi Hills Autonomous District Council (KHADC) aro Jaintia Hills Autonomous District Council (JHADC)-ni term-ko sorkarini ra·dodapatna miksonganiko Voice of the People’s Party (VPP) aro dingtang dingtang dolrang jegaltokengoba, ia district council damgnini term-ko ra·dodapchina proposal on·aniko Sukrobar salo, a·dokni Cabinet ra·chakangaha.
KHADC aro JHADC-ni term-ko sorkari, jadokna ra·dodapatahani gimin ia district council damgnini election-koba ra·doatna nangao ga·akaha.
KHADC aro JHADC-ni term-ko ra·dodapatani gimin kobor ra·timgiparangna talate on·angengon, delimitation committee-ni term-ko ra·dodapna adita salrangna skangsan KHADC aro JHADC, a·dok sorkarina proposal-ko on·ataha aro iako District Council Affairs department baksana a·dok sorkari nipilangenba Sukrobar salo ra·chakaha ine a·dokni Deputy Chief Minister Prestone Tynsong parakataha.
KHADC aro JHADC-ni term, re·baenggipa March jani 4 tarikon bon·engahani gimin ia district council damgnini gital dilgiparangko seokna gita election-ko ong·atna nangengahachim.
Indake ong·genchimoba, da·o KHADC aro JHADC-ni term-ko jadokna ra·dodapattaiahani gimin ia district council damgnini election-koba ra·doatna nangao ga·aktaiengaha.
Deputy Chief Minister-ni parakatani gitade, re·anggipa bilsion KHADC aro JHADC-ni constituency-rangko gital dake sualpilna delimitation committee-ko songahachim indiba ia committee-ni kamrangko da·onan matchotsrangkujaengani gimin ia district council damgnini delimitation committee-naba somoi on·dapkuchina bi·aha aro uandaken KHADC aro JHADC-ni delimitation committee-na somoiko on·dapna gita ia district council damgnini term-ko sorkari jadokna ra·dodapataha.
KHADC aro JHADC-ni term-ko ra·dodapna miksonganirang dongani gimin adita salrangna skangsan VPP-ni dilgiparang, NPP-chi dilenggipa MDA sorkariko matnangatahachim.
“Lokayukta-ni official-rangkode niamrang dongani gimin ra·galaha ine uamang (sorkari) mesokna jotton ka·enga indiba district council-ode term-rangko ra·dona ba election-rangko ja·donggaate dongna maming niamrang dongjani gimin uamang an·tangtangni man·gnina cholko ra·skaenga,” ine adita salrangna skangsan Nongkrem MLA aro VPP-ni president Ardent M Basaiawmoit aganahachim.
KHADC aro JHADC-ni ning·o delimitation dakani ba constituency-rangko sualtaienggipani bidingo janapatengon, “Ian ADC-ni term-rangko ra·dona aro election-ko ru·utatna sorkarini miksonganiko pa·sikna dakanisan ong·aia,” ineba VPP-ni president matnangatahachim.
