Rev Dilseng Sangma-ko ABDK-ni gital general secretary songa
TURA: Re·anggipa January 31 tarik dipet West Garo Hills a·jani Balupara songo donggipa Bethel A·brio ong·atanggipa A·chik Baptist Dal·gipa Krima (ABDK)-ni chang 150-gipa tom·bimonganiko Robibar salo matchotataha.
Ia chang 150-gipa tom·bimonganio dingtangmancha ABDK-ni bilsi 150 gapani ba Sesquicentennial Jubilee-koba February 3 aro 4 tarikrango maniangjolaha aro ia tom·bimonganio, Baptist World Alliance (BWA)-ni president Tomas Mackey-ba re·bae bakko ra·angaha.
Ia tom·bimonganio BWA-ni president Tomas Mackey, ABDK-ni hajal kotok manderangna aganprakangengon, A·chikrangni ka·saani aro nambee sokachaksoanina mittelpilaniko parakangenba, re·baenggipa bilsini July jao, Australia a·songni Brisbane songjinmao ong·atna sienggipa BWA-ni tom·bimonganiona re·ange bakko ra·echina gita ABDK-ni membor sakantikon didiangaha.
Robibar salni olakkianio, Indian Evangelical Mission (IEM)-ni general secretary Rev Dr Raja Singh Elias, Gitrang 126:3-o pangchake, Isolni namgipa kattarangko aganprakangaha aro uni aganprakanio ua, Kristian bebera·gipa sakantikon Gitel Jisu Kristoko bebera·e, Isolna dangdike on·giparang ong·china didiangaha.
Ia tom·bimonganio ABDK-ni padot Sundarsingh A Sangma-ba jinmana aganprakengon, da·o ong·enggipa ABDK-ni general secretary Rev Janang R Sangma, ia bilsini May jaon, kamtangoni neng·take, dingtang kamrango Nokgipa Isolna dangdike on·angskana siengahani gimin uni biapo Rev Dilseng M Sangma-ko ABDK-ni gital general secretary songskana ABDK-ni governing council tik ka·aha ine parakataha.
ABDK-ni chang 150-gipa tom·bimongani bon·kamgipa salo, Meghalaya a·dokni dingtang dingtang dilgiparang, chong·motan a·dokni Chief Minister Conrad K Sangma, Meghalaya Assembly-ni Speaker Thomas A Sangma, Education Minister Rakkam A Sangma, MLA-rang aro dingtang dingtang dilgiparangba re·bae bak ra·angtokaha.
Ia tom·bimonganio a·dokni Chief Minister Conrad Sangma, jinmana aganprakangengon, ABDK aro Baptist Missionary-rangni on·gilpagipa kamrangna mittelpilangenba, ia tom·bimonganio dongpae bakko ra·na man·ahani gimin Nokgipa Isolko mittelpilangaha.
BWA-ni president Tomas Mackey aro dingtang dingtang biaprangoni re·bagipa delegate-rangnaba ua rimchaksoani kattarangko aganangengon, Meghalaya a·dokona Kristian toromko ra·baahani a·selsa da·alo lekka pora, an·seng baljokani aro pilakni gitan namroro silroroaniko nikna man·engaha ine Chief Minister parakataha.
ABDK-ni chang 150-gipa tom·bimonganiona Garo Hills-onisan ong·aigija dingtang dingtang biaprangoniba hajalni hajal manderang tom·chimongbae bakko ra·angtokaha.
ABDK-ni bilsi 150 gapani ba Sesquicentennial Jubilee manianiko re·baenggipa 2025 bilsini ABDK tom·bimonganio matchotatgen ineba ABDK-ni dilgiparang u·iataha.
