TURA: Pradhan Mantri Ujjwala Yojana (PMUY)-ni ning·o gas cylinder-rangko suale on·enggipa mitam manderang, Garo Hills-ni badiaba badiaba biaprango, ia scheme-ni namgniko man·na seoka man·gipa kangal cholrirangoniko tangka ra·enga ine Robibar salo, Tura-ni MDC aro Bharatiya Janata Party (BJP)-ni state vice president Bernard N Marak parakataha.
Marak-ni parakatani gitade, Garo Hills-ni badiaba badiaba biaprango, PMUY scheme-ni ning·o gas cylinder-rangko suale on·enggipa manderang, nokdang ge·prakoniko gong 1000-oni gong 1500-ona kingking dabie ra·enga.
“Sorkarini indin on·enggipa gas cylinder-rangko ra·na gita nokdang ge·prako gong 1500/- ka·e gamchina aganenga ine mijalosan angna South Garo Hills a·jao donggipa Rewak songoni mande saksa phone ka·e u·iataha. Iana agreba anga Garo Hills-ni gipin biaprangonikoba apsan dakgipa badi ka·anirangko man·soaha. Uni gimin ia scheme-ko man·enggipa manderangoniko tangka bi·jachina gita dingtangmancha gas distributor-rangna ge·etaniko on·china na·simangko mol·molatenga aro iandake kangal cholgrirangoniko tangka dabie ra·enggipa distributor-rangni kosako rakgipa ja·kurangko de·china didienga,” ine Tura MDC parakataha.
PMUY-ni gimin talataniko on·angengon, ian Below Poverty Line (BPL)-o ga·akgipa me·chikrangna ma·mong sorkarini ra·gate on·gipa scheme ong·a aro ia scheme-ni ning·o me·chikrangna gas cylinder-rangko indin chate on·anisa ong·a ine Marak parakataha.
“Kg 14.2 ong·gipa gas cylinder-ko skanggipa changdokna kingking refill ka·aninade, ia scheme-ni beneficiary-rang tangka paisarangko gamna nangja aro snigipani ja·mansa EMI-ko gamna nanga. Ian Prime Minister Narendra Modi-ni kangal cholgrirangna ka·sae on·gipa cholsa ong·achim indiba mitam manderang, kangal cholgrirangna on·enggipa cholrangko ra·sekna jotton ka·enga,” ine BJP-ni state vice president parakataha.
