SHILLONG: Meghalaya Legislative Assembly-o kamrangko ka·anio lekkarangko jakkalna nangjana gita National e-Vidhan Application (NeVA)-ko jakkalna tariengaha ine Sombar salo, Leader of Opposition (LO) ba Opposition dolni dilgipa Ronnie V Lyngdoh parakataha.
Ia NeVA-ko jakkalani bidingo Sombar salo, Meghalaya Legislative Assembly Secretariat-ni ning·o donggipa IT Cell-ni official-rang, Opposition dolni dilgipana, Police Bazar-o donggipa Meghalaya Assembly-ni Administrative Block conference hall-o skie on·angaha.
Assembly-o NeVA-ko jakkalna a·bachengatengahani gimin Assembly-ni Speaker Thomas A Sangma aro Assembly Secretariat-ni official-rangko mittelpilangengon, ia application-ko jakkalanichi, samtangtango ong·telaigiparangko ripinganio mongsonggipa kamko ka·na man·gen ine Lyngdoh parakataha.
Ia NeVA-ko jakkalanichi, sing·anirangko aro u·iatanirangko je biaprangoniba dakna man·aigen ineba Lyngdoh talataniko on·angaha.
Ia application-ni ning·o Assembly-ni membor sakantinan, sing·anirangko aro u·iatanirangko on·na gita dingtangmancha page-rangkoba donahachim.
Ia NeVA-ko NIC Cloud MeghRaj tariaha aro ian Assembly-ni kamrangko maming neng·nikani gri aro lekkarangko jakkalani gri Assembly-ni membor-rangko kamrango dakchakna ra·gatgipa application ong·achim.
