TURA: Re·anggipa Robibar walo, South West Garo Hills a·jani song damsao, mande sakgittamko dakait dakanio jak donggipa manderang ine potchipenba, songni manderang jinma chadrapaha aro manderangni chadrapako man·e ia sakgittam manderangoni sakgnide siangna nangaha.
Police-rangni u·iatani gitade, dakait dakgipa manderang ine potchipenba mande sakgittamko Jaluagre (Mangsang Gittim) songni manderang jinma rim·aha ine Garobadha outpost-ona u·iataha aro koborko man·soani ja·man police-rang, ua songona re·angon, mande sakgittamko songni manderang bilongbee dokenba, rama sambao donengako nikeaha.
Manderangni jako dokako man·e saknaanirangko man·ahani gimin bakan ia mande sakgittamko police-rang, Garobadha Primary Health Centre (PHC)-ona ra·angaha indiba sannaniko on·engmiting somoion uamangoni sakgnide siangaha.
Sianggipa mande sakgniara Skagre songni bilsi 30 ong·gipa Balen G Sangma aro apsan songni bilsi 30 ong·gipa Sken D Shira ong·achim ine ma·sina man·aha.
Sakgittamoni saksa, jean Betasing jolo donggipa Arenggre songni bilsi 22 ong·gipa Betuwel D Shira ong·achim, ukode nambate sanna gita ja·mano Tura Civil Hospital-ona watataha.
A·sel ong·gipa biaponiko police-rang, ia mande sakgittamni jakkalgipa AS-15 7176 Maruti 800 car bolsa, an·chi nanggipa boltong ge·sa, mobile phone, kukri, identity card-rang, gong 1700 tangkarang, United Garo People Forum (UGPF) South Western Zone Ampati HQ Tura chairman-ni bimingo tarigipa mohor, UGPF Ampati Zone-ni office bearer-rangko see rakkigipa note book kingsa aro gipin bosturangkoba man·aha ine police-rang u·iataha.
Sianggipa mande sakgnini manggisiko post mortem ka·na gita Ampati Civil Hospital-ona ra·angaha.
Indake ong·engon, ia a·selni bidingo police-rang mokordoma ka·enba, sandirokna a·bachengataha ine police-rang u·iataha.
Police-rangni u·iatani gitade, ia sakgittamoni sakgnikode batanggimin somoirango ong·gija kamrang, jekai mande so·otani, tangkana mande rim·gittangani, tangka dabie ra·ani aro uandakgipa kamrangna police-rang rim·ahachim.
Iandake niamko skatang jako ra·jachina aro manderangni janggiko skatang so·otjachina gita songni manderangko didiatengon, iandakgipa kamrango jak dongako rim·a man·genchimode, dos donggipa manderangni kosako police-rang rakgipa ja·kurangko de·gen ine mikrakataniko on·ataha.