TURA: Garo Hills-ni diltubatsranggipa biaprango, ma·mong sorkarini ra·gate on·gipa scheme-rangko ra·anio neng·nikanirangko man·na nangtokenga ine koborko man·soahani gimin, Garo Hills-ni dingtang dingtang songrangona wenaniko Mongolbar sal dipet Tura-ni MDC aro BJP-ni state vice president Bernard N Marak a·bachengataha.
Ma·mong sorkarini ra·gate on·gipa dingtang dingtang scheme-rangko ra·anio songni nokni manderang neng·nikanirangko chagrongna nangtokenga ine koborko man·soahani gimin Marak, ma·mong sorkarini on·enggipa scheme-rangni bidingo songni manderango sing·sandie ra·na gita South Garo Hills a·jaoni a·bachenge, dingtang dingtang songrangona wenangengachim.
“Garo Hills-ni diltugipa songrangona angni wenani miksonganiara, ma·mong sorkarini on·enggipa scheme ba namgnirangko ra·anio mai dakgipa neng·nikanirangko man·engachim, uarangko ma·sie ra·na wenanian ong·enga aro anga songni manderang baksa agangrike, uamang mai aganchakanirangko on·a, uarangko anga ma·mong sorkarina u·iatpilskagen,” ine Mongolbar salo, South Garo Hills a·jaona wenangna skang Marak parakataha.
Marak-ni parakatani gitade, dingtang dingtang songrangona wenanganio ua, man·a dipet ma·mong sorkarini on·enggipa scheme-rangni bidingo mesoke on·na aro manderangni janggi tanganiko namdapatna jotton ka·gen.
“Viksit Bharat-o block office-ni manderang songrangona re·ange talatanirangko dakaha aro ua talatanichi songni manderangna namgni ong·ahama uko ning·tubate sandianiko dakna anga ia songreaniko dakenga. Songni manderangni janggi tangani namdapja aro tang·doja dipet chinga neng·takjawa ine dolni gita rake jaku de·aniko dakenga. Songni nokma, sordar, laskar, dilgiparang, ma·a paarang aro chadamberang an·tangtangko cholgri cholipaja ine sintee dongainabe. Bate nangarangko janapna chingko gronge golpona re·babo aro nangarangko ku·rang on·bo aro chinga ama dipet na·songko nirokgen. Da·al chinga South Garo Hills-ni Mahadeo, Hatisia aro Budbar salo Moheskola aro gipin songrango napchenggen. Antiprak adita songrangko chinga wengen,” ine Tura-ni BJP MDC parakataha.
