SHILLONG: Re·baenggipa April ba May jani gisepo ong·atna sienggipa Lok Sabha election-na Meghalaya a·doko NPP, Congress, UDP, HSPDP aro gipin dolrang kamrangko ka·chichana a·bachengtokengahaoba da·onan Trinamool Congress (TMC) dolde, ia election-o susagenma susajawa ma·siskakujaenga.
Re·anggipa 2023 bilsini Meghalaya Assembly election-o TMC dol, rakbee kamrangko ka·ahaoba seat dambongakosan chena man·aiahachim aro uni ja·mande TMC dolni gita Meghalaya a·doko maming kamrang dongjaengahachim.
Koborko man·soani gitade, TMC Meghalaya unit baksa Kolkata-ni dilgiparang maming agangrikanirangba dongjaenga aro uandaken da·o Lok Sabha election-o uamang susagenma susajawa name ma·sikujaenga.
Iani bidingo TMC Meghalaya unit-ni state president Charles Pyngrope-o sing·sandiaton, Lok Sabha election-o susagenma susajawa, TMC-ni high command-onin maming u·iatanirang dongkujaenga ine parakataha.
TMC Meghalaya unit-ko ma·mongni dilgiparang galchipengahama ine sing·aninaba ua mamingkon aganchakna jechakaha.
Lok Sabha election-o susagenma susajawa da·onan high command-oni maming u·iatanirang dongkujaengani gimin Meghalaya a·doko TMC-na kam ka·enggipa manderangba, mikkangchi TMC mai ong·na sienga mamingkon aganna man·tokjaenga.
Indake ong·genchimoba, TMC-ni dilgiparang, Tura Lok Sabha constituency-ode susana chanchienga ine kobor on·timgiparang parakatskaaha.
Meghalaya a·doko TMC-ni MLA sakbonga aro MDC sak 10 donggenchimoba, ma·mongo TMC-ko dilenggiparang, Meghalaya a·dokna gisik nange mesokjaenga ineba kobor on·timgiparang aganaha.
Koborko man·soani gitade, re·anggipa bilsio TMC dolna rakbee kamrangko ka·e on·gipa IPAC-ni mitam manderangba adita salrangna skangsan Meghalaya a·dokko wate re·angpiltokaha.