SHILLONG: Mongolbar salo, Meghalaya a·dokni dingtang dingtang a·jarango donggipa self help group-rangna Pradhan Mantri Krishi Sinchayee Yojana (PMKSY-WDC 2.0)-ni ning·o, dingtangmancha SHG dolprakna gong 50,000-ni cheque-rangko a·dokni Chief Minister Conrad K Sangma aro a·dokni Soil & Water Conservation Minister Marcuise N Marak-ni jakchi suale on·ataha.
PMKSY-WDC 2.0-ni cheque-rangko suale on·anganio a·dokni Chief Minister, jinmana aganprakengon, a·doko bang·bea chiring chibisikrang aro chimarang donggenchimoba chirangko rakkianio bang·en neng·nikanirangko chagrongna nangrongani gimin sorkari, chirangko ripinge rakkina gita minggni cholrangko ra·gatenga indiba a·dokni manderang an·tangtangba chirangko ripingna gita dingtang dingtang cholrangko sandina nangenga ine didianiko on·angaha.
Pilak a·songrangnan chiara namen nangchongmotgipa ong·a aro bang·bata a·songrangon ringani chirangko altuae man·rongja ine janapatengon, iandakgipa neng·nikanirangko chagrongna nangengani giminsa dingtang dingtang department-rang aro PMKSY-WDC 2.0-ni ning·oba chonchongipa check dam-rangko tarina, pokkrirangko kitna aro chi tengkirangko rikna cholrangko on·enga ine Chief Minister parakataha.
“Meghalaya a·doko bang·bata manderangan janggi tangna gita buring bolgrim, a·a aro chirango pangchaktoka aro manderangna chirangko on·na gita sorkari, minggni cholrangko ra·gataha indiba manderang an·tangtangba an·tangtangna pangkamgipa janggi tangani cholrangko ra·na gita sorkari baksa bakrime, chiring chibisikrangko ripingna nanggen,” ine Sangma aganaha.
Ia tom·anio a·dokni Soil & Water Conservation Minister Marcuise Marak-ba dingtang dingtang SHG-ni membor-rangna aganprakangengon, PMKSY-ni bidingo talatanirangko on·angenba, ia scheme-ko ra·gatanichi a·dokni dingtang dingtang SHG-rangna kamrangko ka·e cha·na cholrangko on·enga ine parakangaha.
PMKSY-ko ra·gatani miksonganiara, manderangni janggi tangani gadangko nambatatna miksonganisan ong·aija indiba a·doko game ge·e cha·enggipa manderangni game ge·e man·aniko bariatna miksonganiba ong·a ineba ua aganaha.
Ia program-ko ong·atanio, Khasi, Jaintia aro Garo Hills a·jarangoni dingtang dingtang SHG-rang re·bae bak ra·angtokaha.
