AMPATI: Songadam nokadamrango donggipa nokdangrangni janggi tanganiko namdapatna sorkarini ra·gatgipa Prosperity of Grassroots Families through Livestock Intervention Scheme (PROGRESS) program-ni gnigipa bakko re·anggipa Budbar salo, Animal Husbandry & Veterinary department-ni gita South West Garo Hills a·jao a·bachengate on·angaha.
Ia program-ko Ampati-ni Vocational Training Centre-o ong·atangaha aro ia program-ko ong·atanio, South West Garo Hills a·jani Additional Deputy Commissioner YW Momin, mongsonggipa sokgipa ong·e bakko ra·angaha.
Ia tom·anio ADC YW Momin, jinmana aganprakangengon, ia program-o bakko ra·na re·baahani gimin ia scheme-ni namgniko man·enggipa manderangko mittelpilangaha aro do·orangko jile cha·anio, an·tangtangni man·dapgnina gisiko nange kamko ka·china didiangaha.
Incubator-rangko jakkalanio pangnan niamrangko ja·rikchina aro AH & Vety department-ni dakchakanirangko ra·china gitaba Momin ku·pattiangaha.
Ia program-ko ong·atanio Momin-ni jakchi, incubator baksana do·o bi·sarangko, ia scheme-ni ning·o seoka man·gipa manderangna suale on·angjolaha.
