TURA: India a·songni dingtang dingtang a·dokrango rikgipa dam 41 Addiction Treatment Facility (ATF) baksana Tura Civil Hospital-o rikgipa ATF-koba Bristibar salo, India sorkarini ning·o donggipa Social Justice & Empowerment Ministry-ni Dr Virendra Kumar, internet gita nokdonggae on·angaha aro ia ATF-rangko nokdonggae on·anganio Social Justice & Empowerment-ni Minister of State Ramdas Athawale, Minister of State A Narayanaswamy, Minister of State Pratima Bhoumik aro gipin dilgiparangba bak ra·angtokaha.
Tura Civil Hospital-o ia Addiction Treatment Facility-ko nokdonggae on·atani somoio, West Garo Hills a·jani Deputy Commissioner Jagdish Chelani, Superintendent of Police (SP) Abraham T Sangma, Social Justice & Empowerment-ni PMU Coordinator Indu Verma, Meghalaya sorkarini ning·o donggipa Social Welfare department-ni Joint Secretary Sabrella Marak, Additional Deputy Commissioner Leena Daring, Tura-ni District Medical & Health Officer Dr Jakrambal A Sangma aro dingtang dingtang official-rangba bak ra·angskaaha.
Tom·ani a·bachengachibara, ATF-ni District Nodal Officer aro Senior Psychiatrist Dr Bollen Sangma, ia Addiction Treatment Facility-ni gimin agan-talate on·angengon, pekatgipa sam ba churangko jakkalanio ranta ong·aniara ua mandenasan ong·aigija uni nokdang gimiknan namgijako ra·bana man·a aro basakobarangde ainni gita sastirangkoba chakna nanga ine parakataha.
Ia tom·anio dingtangmancha pekatgipa bostu jakkalaniko champengna jinma ku·mikchetanikoba dakangjolaha.
Photo: Tura Civil Hospital-ni Addiction Treatment Facility-ko nokdonggae on·ani somoio West Garo Hills a·jani Deputy Commissioner Jagdish Chelani, Superintendent of Police (SP) Abraham T Sangma aro dingtang dingtang official-rang, pekatgipa bostu jakkalaniko champengna jinma ku·mikchetenga.
