TURA: West Garo Hills a·jani badiaba badiaba biaprango niam gri check aro toll gate-rangko chalaienga ine badi ka·anirangko man·soahani gimin West Garo Hills a·jao niam gri check ba toll gate kulie chalaianiko champengna gita Section 144 CrPC-ko ra·gataha ine West Garo Hills a·jani District Magistrate u·iataha.
West Garo Hills a·jao niam gri chalaienggipa check/toll gate-rangko sandie, pe·e galchina gitaba West Garo Hills a·jani District Magistrate, sub-divisional magistrate-rangna, police-rangna, forest official-rangna aro dingtang dingtang official-rangna ge·etaniko on·ataha.
Ia niamko saoba pe·genchimode aino pangchake rakgipa sastirangko man·gen ineba ua mikrakataniko on·ataha.
Ramarango toll gate-rangko kulie garirangoniko kajina gilengani a·selan ma·manti bosturangni damrang tang·doenga aro ramram manderangsa neng·nikanirangko chagrongna nangtokenga ine dingtang dingtang dolrang badi ka·doangtokahachim.
