W’nagar-o Track & Field Stadium-ko rikna tangka paisarangko chamatgen: CM
WILLIAMNAGAR: Bristibar salo, a·dokni Chief Minister Conrad K Sangma, Williamnagar Government College-ni Academic Block, Girls aro Boys Hostel-rang baksana Mini Outdoor Stadium aro Entrepreneurship Promotion Development Program-ni ning·o gital rikgipa Entrepreneurship Cell-ko nokdonggae on·angaha aro ia nokrangko nokdonggae on·anganio, a·dokni PHE Minister Marcuise N Marak, Rongjeng-ni MLA Jim M Sangma, Amlarem-ni MLA Lahkmen Rymbui, a·dokni Chief Secretary DP Wahlang aro gipinrangba dongpae bak ra·angtokaha.
Ia nokrangko nokdonggae on·angani somoio a·dokni Chief Minister, jinmana aganprakangengon, PA Sangma sagi aro Donkupar Roy sagini dilanichi Williamnagar Govt College-ko 2008 bilsion provincialise ka·ahachim indiba untalan ia college-ko maming nirok sandianirang dongjae mamingni gitan namdapataniko nikna man·jahachim ine parakataha.
Uni giminsa 2018 bilsio gital sorkariko rikani ja·man, ia college-ni Academic Block aro chatro chatrirangna dongchakani hostel-rangko rikna gita 2020 bilsio pangchakaniko songaha aro da·alo ia nokrangko nokdonggae on·na man·aha ine Sangma, an·tangni kusi ong·aniko parakataha.
“Lekka porani gadangko namdapatna gitade skanggipa bida budi ra·chakram biaprangkon namdapatchengna nanggen,” ine ua aganaha.
2018 bilsioni da·alona kingking, Meghalaya a·doko dingtang dingtang skul aro college-rangko rikna aro namdapatna gita a·dok sorkari, gong crore 500-na baten koros ka·aha ineba ua aganaha.
Mikkangchide Williamnagar aro Resubelpara gita dakgipa jillarangba Meghalaya Games-ko sokachakna man·na nanggnok ine janapatengon, iani bidingo Williamnagar MLA-ni bi·a gita Williamnagar Mini Stadium-o Track & Field stadium-ko rikna sorkari tangka paisarangko chame on·anggen ine Chief Minister parakataha.
Williamnagar, Baghmara aro Sohra Govt College-rango Science aro Commerce stream-rangko a·bachengna gita bakan Cabinet, proposal-rangko ra·chakanggnok ineba Chief Minister parakataha.
A·doko chadamberangna janggi tangani chol aro an·tangtangni changa sapanirangko mesokna sorkarini ra·gatgipa dingtang dingtang program-rang, jekai Prime Entrepreneurship, YESS Meghalaya, CM Elevate, Meghalaya Games, Grassroots Music program aro uandakgipa program-rangni giminba ia tom·anio Chief Minister talate on·angaha.
Ia tom·anio a·dokni Education Minister Rakkam A Sangma-ba jinmana aganprakangengon, Williamnagar Govt College-oba gipin dal·dalgipa songjinmarangni mingnamgipa college-rango man·enggipa apsan lekka porani gadangkon man·na nanga ine college-o skigiparangko on·kange kam ka·china didiangaha.
Apsan daken chatro chatrirangkoba college-na mikkim rasongko ra·bagiparang ong·na gita bimchipe poraichina Education Minister didiangaha.
Photo: Williamnagar Government College-ni Academic Block, Girls aro Boys Hostel-rang baksana Mini Outdoor Stadium aro Entrepreneurship Promotion Development Program-ni ning·o gital rikgipa Entrepreneurship Cell-ko a·dokni Chief Minister Conrad K Sangma, nokdonggae on·enga.