TURA: Sukrobar salo, a·dokni Education Minister Rakkam A Sangma aro Power Minister AT Mondal, Dadenggre Sub-Division-ni Lower Primary skulrangna gital rakkiako man·gipa sak 192 skigiparangna, Tura-ni District Auditorium-o Teachers Initiative Conclave-ko ong·atanio, appointment letter-rangko suale on·angaha aro ia tom·anio, MIDC-ni Chairman James PK Sangma, Selsella-ni MLA Arbinstone Marak, Education department-ni Secretary Ambrose Ch Marak, West Garo Hills a·jani Deputy Commissioner Jagdish Chelani aro gipinrangba dongpae bak ra·angtokaha.
Ia gital skigiparangna appointment letter-rangko sualatna gita tom·aniko ong·atanio a·dokni Education Minister, jinmana aganprakangengon, ia Teachers Initiative Conclave ba tom·bimonganiara gital skigiparangna appointment letter-rangko sualna ong·atenggipa programsan ong·aija indiba ia gital skigiparangni kam ka·na an·tangtangko tarianio, sorkarini niksamsoanirangko aro nangnikanirangko mesoke on·ani programba ong·enga ine parakataha.
Garo Hills-ni dingtang dingtang sorkari skulrango lekka porani gadangko tang·doatna gita an·tangtangko on·kange aro kakketo kam ka·china gitaba ua gital skigiparangko didiangaha.
Gital skigiparangna an·tangni namgipa skaniko on·angengon, a·dokni manderangna sorkarini niksamsoaniko chu·sokatanio uamangba bak ong·na nanga ine Education Minister aganaha.
Class 1-oni Class 10-ona NCERT textbook-rangko ra·gatenggipani bidingo janapatengon, NEET, JEE aro uandakgipa a·songni dingtang dingtang porikkarangona chatro chatrirangko tarisamsona gitasa sorkari, ia ja·kuko de·aha ine Sangma talataniko on·angaha.
Ia program-ko ong·atanio, MIDC-ni Chairman James PK Sangma, a·dokni Power Minister AT Mondal aro gipinrangba aganprakangaha.
Ia tom·anio dongpae bakko ra·anggipa gipin manderangara, West Garo Hills-ni District School Education Officer RTK Sangma, Dadenggre-ni SDSEO RTK ED Sangma, Education department-ni officer-rang aro gipinrang ong·a.