SHILLONG: Meghalaya a·doko jilarangni namroro-anina Meghalaya Building Bye-Laws of 2021-ni amendment-ko Sukrobar salo a·dok Cabinet ra·chaka-ha. Nok building-rangko naljokatna, chonchongipa a·a nokgiparangna a·ako name dake jakkalani aro nok building-ni chue rikako nirokna man·a Union sorkarini dongimin provision-rang baksa ritingo amendment-ko ra·baha ine Cabinet tom·ani ja·man Chief Minister Conrad K Sangma aganaha.
Shillong Mobility Policy, 2024-koba Cabinet ra·chakjolaha. Shillong-o mobility-ko namdapatna ma·mong nangtelataha, policy-o public transport, rama re·aniko tarina aro garirangko donchakna aro gipin ugita dakgiparangko man·chapataha.
“Amendment aro policy-ko ra·baaha jedakode a·doko Special Assistance on Capital Investment for Urban Areas scheme-ko man·gen ine Sangma aganaha.
Scheme-na tangka kror 15,000-ko ma·mong chama-taha jeon nangchongmot-gipa guideline-rang aro policy-rang baksa kam ka·angchapgen, ine ua aganaha.
“Meghalaya a·dokna tangka kror 619-ko proposal-o chinga donataha jekon chinga tangka kror 500-ni gitako man·soaha aro bangki dongkuenggipa tangka kror 100-ko amendment aro policy-rangko biapo donani ja·man man·-sona ka·dongsoenga,” ine ua aganaha.
Ian nok building rika-rangko naljokaniko man·at-na ong·a aro chonchongipa a·a nokgiparangni gita a·ako nambatana jakkalna man·a maina nok rikani wilwila biapo a·jitcha biap dongatna man·gen ine Chief Minister aganaha.
“Biapko komiataha aro ge·gipin amendment jekai chugipa nok building-rangko rikna ge·etaniko ra·na nanganiko donaha. 50 degree ba una batgipa a·solsol dakgipa biapo rikna tanggitikgipa provision-ko galangna man·-gen,” ine Sangma aganaha.
Dal·dalgipa a·dokrang jekai Assam aro Uttar Pradesh a·dokrang urban biaprango capital invest ka·angannio dingtang-manchagipa dakchakaniko man·ani gita tangka kror 500-ko man·soenga, apsan dake Meghalaya a·dok man·sona ka·dongsoenga, ine ua aganaha.
Shillong Urban Mobility Policy of 2024-na Shillong-ni rika choani project-rangni series-ko dakna a·bachengatna a·dok sorkari chanchienga, ine ua agandapangaha.
Songjinmaona bijolini bus garirangko man·a dipet sorkari ta·rake ra·bagen ine koborna u·iataha. Policy-nbi ning·o, footpath-rangko namdapatna gari parking-rangko bang·-dapatna aro public transportation-rangko nam-dapatna gipin cholrangko ra·bana sorkari chan-chienga ine Chief Minister aganaha.
2025 bilsio ge-4 parking biaprangko matchotatna sorkari tender-ko galchina on·aha ine ua aganaha.
Rama re·ani km 10-15 bakrobegipa skywalk-ko tariangna sorkari niang-enga ine ua aganaha. “Apsan nangdimgipa rama re·ani biap (a·ao) aro chonkalgipa skywalk-rangko maming traffic-na nengnikagrio tariangna chinga da·o niangenga,” ine ua agandapangaha.
Mitam sorkari a·arangko gital park-rangko tariangna aro rama re·rurana biap dongatna aro namnamgipa ramarangko tariangna sorkari nangnikenga ine Sangma agandapangaha. Ward’s Lake aro Pinewood Hotel junction-oni Botanical Garden-ona biapko taridapangna sorkari chan-chienga, ineba parakataha.
