TURA: Megh Farm Proces-sing Hub aro Tikrikilla Prime Hub-ko February 10 tariko Meghalaya Chief Minister Conrad K Sangma-chi oprakaha. Power Minister A T Mondal, Lok Sabha MP, Agatha Sang-ma, Tikrikilla MLA Jimmy D Sangma, Raksamgre MLA Limison D Sangma, Selsella MLA Arbinstone B Marak, Salmanpara MLA Ian Botham K Sangma, Nogorpara MDC Linekar K Sangma, West Garo Hills-ni Deputy Commissioner Jagdish Chelani, Superintendent of Police Abraham T Sangma aro Managing Director, Muktidata Multi Purpose Cooperative Society, Fr Binoy Joseph dal·dalgipa dilgiparangni dongpaanio ge-2 rikgipa nokko Chief Minister opraka.
Megh Farm Processing Hub aro Tikrikilla Hub-ko tangka kror 14 lak 10-chi rikaha aro gama ge·gipa bosturangko salprako 20 metric ton-ko ong·katatna man·ani bil donga. Bub ge·prako ge-2 cold storage unit-rang donga jeon biljolirang dongjagen-chimoba minus 40 aro minus 10 degree-ni temperature-ko name dake rakkina man·gen, iana dingtang-mancha teke on·giparang-ko mittela jeon bijoliko name dake chu·onga gita man·-angna solar power panel-ranko teke on·aha. Processing hub salantio bang·a Jam aro juice-ko metric ton 15-ko ong·katatna man·gen.
A·doko da·o dipet processing hub-ko ge·sa dal·batsranggipa dake ra·angna man·gen aro iako a·doknni gamjin dake chanchina manderangko Meghalaya a·dokni Chief Minister Conrad Sangma mol·molangan baksa aganangaha. Processing plant-o 110 kilowatt solar panel-ko nanga aro Prime Hub jeon cha·anirangko nambate tariangani technique-rang aro nanga bosturangni gimin game ge·e cha·giparangna aro chadamberangna skie on·anganniko dakgen, ine Chief Minister u·iataha. Processing plant ge·prakon ge-2 cold storage unit-rang donga jeon bosturangko ka·sinate rakkina minus 40 aro minus 10 degree temperature-o dongna man·gen jean game ge·e cha·gipa-rang uamangni rim·taltal-gipa na·tokrangko ruuta somoiona maming nosto ong·a gri rakkina dakchak-gipa ong·gen ine Sangma aganaha.
Indakgipa bang·a rika choanirangko nangani bidingo Chief Minister aganangaha, nangchong-motgipao pangchaka aro rama gadangko parakataha, jeon a·dokni ge-50 C&RD Block gimiko mini processing plant-rangko rikang-gen. Mijamangmang Nidanpur-oni Syamnagar rama-na tangka kror 20-ko chamataha aro iana kam-rangko ta·raken a·bacheng-atgnok ine Chief Minister u·iataha.
A·dokni ong·katatgipa bosturang jekai haldi, cashew aro ugita dakgipa-rangko a·dokni a·palchina watatna man·aha aro a·dok-ni game ge·e cha·gipa-rang name dake a·palchina watatna man·anichi nam-gnirangko man·engaha ine tom·bagipa mande jinmana Lok Sabha MP Agatha Sangma aganangaha. A·doko indakgipa mong-songgipa project-rangna ja·ku de·anina sorkariko MP mittelaha.
Programme-ni somoio Chief Minister baksana a·dokni dilgiaprangchi cooperative society-rangna aro songni organization-na bakrimanio aro gama ge·a-nio gisiko nanganina name dakahanina Community Investment Fund (CIF) MSRLS-ni ning·o tangka kror 1 lak 23 hajal 20-ni cheque-rangko on·angaha.
Muktidata Multi Purpose Cooperative Society-ni Managing Director Fr Binoy Joseph, a·doko indakgipa nangchong-motgipa project-ko ra·bana ja·ku de·anina Chief Minister-ko mittele aganaha aro plant-o songtangni cha-dambe sak 60 kam ka·e cha·na man·gnok aro apsan somoio salantio sak 100 kam ka·e cha·giparangna tangka paisa kamaiangnaba man·gnok ine aganangaha.
