TURA: Diocesan St Joseph Sodality-ni chang 29-gipa bilsini tom·bimonganiko salgittamna Tura-ni Walbakgre-o donggipa St Luke Parish-o ong·ate, ia tom·bimonganiko Robibar salo matchotataha.
Ia tom·bimonganiko, dingtangmancha ‘Angan Mesrangni cholguga’ (Johan 10:7)-o pangchake, February 8 tarikoni a·bachengataha aro Robibar salo, ia tom·bimonganiko matchotatanio, Tura-ni Auxiliary Bishop CJ Jose, Isolni namgipa kattarangko, donsogimin sastroni bako pangchake, jinmana aganprakangaha.
Sagipa manderangko aro papi manderangko Jisuan an·sengatna aro jokatna ama ine aganprakangengon, saanirangna bate mandeko paprangsa Isoloni chel·atrongani gimin manderang pap ka·aoni chel·e dongna nanga maina ia paprangan mandeko Isolni pattiaoniko champenggipa ong·a ine Auxiliary Bishop aganaha.
Jeko dakgenchimoba pangnan Isolni rasongna dakchina aro Isolni ka·saani aro ka·sachakanio dal·rorochina gitaba ua tom·anio bak ra·giparangko didiangaha.
Ia tom·bimonganiko matchotatani salo, Garo Hills Autonomous District Council (GHADC)-ni Chief Executive Membor Albinush R Marak, mongsonggipa sokgipa ong·e, jinmana aganprakangskaengon, ia tom·bimonganio bakko ra·epana man·ahani gimin an·tangni kusi ong·aniko parakangenba, songsalni pagiparangko, Rongtalgipa Joseph-ni janggi tangani gita aro uni skianirang gita janggi tangchina ku·pattianiko on·angaha.
Mondolio saksa sakgipinko dakchakgrikchina gitaba ua tom·aniona re·bagipa sakantikon didiangaha.
Ia tom·bimonganiko a·bachengatani salo, Tura-ni MP Agatha K Sangma-ba bakko ra·angaha aro Tura-ni Bishop Andrew R Marak, jinma tom·aniko dilangskaahachim.
Chang 29-gipa Diocesan St Joseph Sodality Annual Convention-ko ong·ata
Date:
Share post:
