SHILLONG: Ri Bhoi a·jana aro Meghalaya a·dok gimiknan an·tangko on·kange kamrangko ka·ahani gimin Ri Bhoi a·jani Young Minds Association (YMA), dingtangmancha Meghalaya a·dokni gitcham Chief Minister Dr DD Lapang-ni statue ba mangkrongko Nongpoh-o donggipa Ri Bhoi College-o songaha.
Ia mangkrongko, a·dokni gitcham Chief Minister Dr Lapang an·tangan oprake on·angaha aro ia mangkrongko oprakanio, a·dokni Deputy Chief Minister Prestone Tynsong, Cabinet Minister Ampareen Lyngdoh, Nongpoh MLA Mayralborn Syiem aro dingtang dingtang dilgiparangba dongpae bak ra·angtokaha.
Ia mangkrongko oprake on·angani somoio Dr Lapang, jinmana aganprakengon, ia mangkrongko songanichi an·tangna mande ra·pilskaaniko dakahani gimin YMA-ni dilgiparangko aro membor-rangko mittelpilangenba, an·tangni tangenga dipet Ri Bhoi a·janasan ong·aigija Meghalaya a·dok gimiknan dangdike on·angkugen ine ku·rachakaniko on·angaha.
Ia tom·anio, a·dokni Deputy Chief Minister Prestone Tynsong-ba jinmana aganprakengon, Dr DD Lapang, saksa Ri Bhoi a·jao aro Meghalaya a·dokosan ong·aigija a·song gimikni gitan dilna changgipa mande ong·a ine mittelpilangaha.
