Ia a·selni bidingo sorkari aro BSF tom·e chanchirima
SHILLONG: Re·anggipa Robibar salo, West Jaintia Hills a·jao, Amlarem Sub-Division-ni ning·o donggipa Muktapur Veterinary Dispensary-ni Animal Husbandry & Veterinary Officer Dr Seiboklang Buam-ko BSF-ni sipairang, silchidarechi goe galna ka·mikkenatan baksana ma·manti kragija kattarangchi aganaha ine matnanganiko BSF Meghalaya Frontier-ni official-rang jegalataha.
BSF official-rangni parakatani gitade, Robibar salni 12:05 bajimango, Veterinary Officer Dr Buam, Indo-Bangla sima gita Lahroh Nala-chipak re·angengako nike BSF-ni sipairang uko champengsoenba sing·sandion, ua BSF sipairangko raka kattarangchi aganpangpile, uamangko video ka·e ra·na a·bachengaha. Video ka·jachina uko mol·moloba ua BSF sipairangni mol·molaniko knachakgija, BSF sipairangko ka·mikkenatpilenba ua biaponi re·angaha. Adita somoirangni ja·man ia veterinary officer, songni manderangko rime ua biapona re·bapilaha aro BSF sipairangko chrik a·boke saienba, uni ka·e ra·gipa video-ko jinmana mesokna ka·mikkenataha.
“Ia veterinary officer-ko goe galna ka·mikkenata aro chola ba·ra okata ine BSF-ni sipairangko matnanganiara chu·gimikan tol·e matnanganisan ong·aia aro BSF-ni sipairangko ong·gija dake mesokna jotton ka·anisan ong·aia. A·song damgnini simarango songdongenggipa manderangko chel·chakna gitasa BSF sipairang, simarango kamko ka·enga indiba iandake BSF sipairangko matnanganiara, an·tangtangko on·kange kam ka·enggipa BSF sipairangko ong·gija dake mesokanisan ong·enga. BSF-ni kosako ia pilak matnanganirangan maming pangchakani gri aro kakket ong·ani gri matnanganirangsan ong·aia,” ine BSF Meghalaya Frontier-ni official-rang talataniko on·ataha.
Indake ong·engon, Mongolbar attamni 4:00 bajimango Amlarem Sub-Division-ni Civil SDO Dr Abhishek Saini-ni dilanichi, dingtangmancha tom·aniko SDO-ni office-o ong·atangaha aro ia tom·anio, Amlarem Sub-Division-ni SDPO, Veterinary Officer Dr Saiboklang Buam, Muktapur Police Station-ni police officer aro BSF official-rangba bak ra·angtokaha ine u·iataha.
Ia tom·anio BSF official-rang, ia a·selni bidingo talataniko on·angenba ja·mano dolgnini gisepo nangrimgrikaniko ra·bapilaha ineba u·iataha.
Uni ja·man apsan salon, jolni MLA Lahkmen Rymbui-ni dilanichi dingtang tom·aniko ong·atangaha aro ia tom·ani Meghalaya sorkarini Additional Home Secretary, Law & Order-ni IG, Border-ni IG aro BSF Meghalaya-ni IG-ba bakko ra·angaha.
Ia tom·anio BSF-ni IG, ua somoio ong·a obostako talate on·angenba, a·songo songdongenggipa manderangni namgninasa BSF-ni sipairang an·tangtangko on·kange kamko ka·enga ine parakangaha.
