SWGH-o samni damrangko tik ka·ani bidingo seminar-ko ong·ata

AMPATI: South West Garo Hills a·jani pharmacy-rango aro dingtang dingtang dokkanrango samrangko tik ka·gimin damrango palna man·na gita Budbar salo, Meghalaya State Price Monitoring & Resource Unit (MSPMRU), National Pharmaceutical Pricing Authority (NPPA) baksa nangrime salsani seminar-ko South West Garo Hills a·jani Chengkompara songo ong·atangaha.
Ia seminar-ko ong·atanio South West Garo Hills a·jani Additional Deputy Commissioner (ADC) YW Momin, mongsonggipa sokgipa ong·e bakko ra·angaha aro tom·anio, SWGH a·jani Medical Superintendent Dr D Momin, Sub-Divisional Medical Officer Dr Suparna Hajong, Tura Civil Hospital-ni Grade-I Senior Specialist Dr John RR Marak, SWGH a·jani SDSEO E Marak, MSPMRU-ni Assistant Drugs Controller aro Member Secretary ITD Toi baksana dingtang dingtang officer-rangba bak ra·angtokaha.
Ia seminar-ko a·bachengatanio, SWGH a·jani ADC YW Momin, jinmana aganprakengon, pilak manderangan samko bree jakkalna man·na gita ja·kurangko de·chakate MSPMRU-ko songahani gimin a·dok sorkariko mittelpilangenba, MSPMRU-ni kamrangko ka·anichi South West Garo Hills a·jaoba manderangni neng·nikanirangko namatna man·gnok ine an·tangni ka·dongchakenganiko parakataha.
1997 bilsini August 27 tariko songgipa NPPA-ara, Chemicals & Fertilizers Ministry-ni ning·o donggipa Pharmaceuticals Department-ni ning·o independent regulator ong·e kamko ka·enggipa ong·a aro ian samrangko komia damrango manderangona sokatna gita tik ka·e on·gipa ong·achim.