TURA: Assam a·doko songdongenggipa Kristianrangko aro Kristian Missionary-rangko kragija dake chadrapenga ine social media-rango post ka·anirangko niksona man·engani gimin Assam a·doko songdongenggipa Kristianrangna naljokaniko on·china gita Tura-ni MDC aro BJP Meghalaya-ni state vice president Bernard N Marak, Assam-ni Chief Minister aro North East Democratic Alliance (NEDA)-ni Chairman Himanta Biswa Sarma-na sedoataha.
“Assam a·doko Kristianrangba chengonin gipin jat aro toromni manderang baksa meli-nangrime songdong a·chabaaha indiba ia sal somoirango Kristianrangko aro Kristian Missionary-rangko gipin toromni manderang chadrapenga ine knasoenba, Assam a·doko songdongenggipa Kristianrang kenchipchipe janggi tangna nangtokenga. Uni gimin Assam-o songdongenggipa Kristianrangnaba naljokani aro chel·chakaniko on·china anga nang·ko mol·molatenga,” ine Assam-ni Chief Minister-na seatgipa chittio Marak parakataha.
Tura MDC-ni parakatani gitade, Assam a·doko Satya Ranjan Borah minggipa mandeni dilanichi, a·songo dongimin niamrangko pe·e Kristianrangni kosako dokkol ka·na aro chadrapanirangko dakna jotton ka·engani a·sel, Assam a·doko songdongenggipa Kristianrang aro Kristian Missionary-rang kenchipchipe janggi tangna nangtokengachim.
“Assam-o chingni Kristian jong-ada aro no-abirang maming naljokani gri ong·e kenchipchipe janggi tangna nangtokenga aro ian salgro salaram jolrango manderangni tom·tome janggi tanganiko nisiani gita ong·gen. Uni gimin iandake kragija kamrangko ka·enggipa manderangni kosako rakgipa ja·kurangko de·china aro chingni Kristian jong-ada, no-abirangna chel·chakaniko on·china anga mol·molenga,” ine Marak parakataha.
