Turao Nazing Bazaar Project-ko CM oprake on·a
Tura: Meghalaya Chief Minister Conrad K Sangma mijalo West Garo Hills Tura songjinmao rikgipa Nazing Bazaar project-ko oprake on·aha jeon dokkanrang aro gari donram donggen aro oprake on·ani somoio rikgimin building-koba Pa Sangma niwilwale niangaha.
Bulding-ko oprake on·ani somoio Tura MP Agatha K Sangma, Urban Affairs Department-ni Director E. Kharmalki, IAS, Village Council dilgiparang aro gipinrangba chief minister baksa dongpaaha. Iako a·bachengate on·anichi Turao bading chiwalani a·bakuko aditan nambatatgnok.
Oprake on·anio jinmana aganprakengon, Chief Minister Conrad Sangma, Nazing Bazaar project-ni namgnirangni bidingo jinmana aganangaha, ‘‘Nazing bazar project-na agreba Tura town-ni namgnina chinga dingtang dingtang project-rangko a·bachengataha. Songdonggipa manderangni namgnina chinga integrated secretariat complex-koba rikna chanchienga. Pilak nanganirangko man·chape chinga Integrated secretariat Complex-ko Turao rikna chanchienga. Ia project-na chinga Gong kror 120 tangkarangko chamanaha. Ia complex-o, pilak department-rangan apsan biapon ong·gen, CM office, Cabinet office, conference room aro pilak nanggipa kamrangba damsan ong·gen. Chinga pilak department-rangni a·akon nangrime ra·gen aro gimikchide 25 acre ong·gen. Chinga IT park-naba, kror 120-130 mangni gita chamaha.Chinga ia IT park-na phase 1-ni kamrangkode matchotataha da·o phase 2-ko September ba October mango matchotatgen. Tura town gimikonan Tura beautification project-koba gipatangana miksongenga” ine Pa Sangma aganaha.
Nazing Bazaar project-o maimairang donggen, uarangkoba video tarigipako mesokangaha.
Unomitingo Tura Parliamentary Constituency-ni membor Agatha K Sangma, Sorkarini tikkele kam ka·ani aro chu·sokatanirangni bidingo aganaha. “Ripengrang, ru·uta somoirangna Nazing bazaar complex-ko rikako nikaha indiba da·alo uko oprake on·aniko nikna man·aha. Indake PA Sangma Stadium-ko man·chape Turani dingtang dingtang biaprango namdapatani project-rangko a·bachengataniko nikna man·aha, indake Turani kona-noksik pilakon namroro-silroroaniko nikna gita man·engaha’’ ine Tua MP aganaha.
Indake ia Nazing Bazaar project-ko oprake on·a man·anichi Tura economic growth-na aro songdonggipa manderangna namgniko ra·bagen.
