Nongpoh: Rasong gribegipa koborko Sonibar pringwalni man·soaha, jeon Ri Bhoi District police officer, UBSI Amit Sinha, jean mingsa official kamna Delhiona re·angahachim, Haryana-ni Gurgaon-o, rasong gribee Sonibar pring 3 bajimango gari a·sel ong·e siaha. Indake uni ripeng Digvijay Singh, jean gariko salachim, uaba bang·en mata-bu·ako man·aha.
FIR file ka·gipao janapani gitade, uamang sakgni Sector 58, Gurugram-ona miattam cha·na gita re·angahachim, aro unoni uamangni dongchakram Sector 50 Gurugram-ona pringwalni 3:30 bajimango re·bapilengachim. Uamangni jakkalgipa Mercedes gari HR 25 DG 3865-ko ki·sangchipakni re·bagipa ma·sina man·gijagipa gari Sanar International Hospital sepango su·pekeaha. Indake su·pekani ja·mano, uamang uamangni gario rakkina man·na man·jae ramako bak dakgipa divider-o su·tingeaha aro uamang sakgnian bilongbee saknaaniko man·ahachim.
Mikrontangchi nikgiparang Sinha aro Singh mangko garioniko bikongkataha aro Sanar International Hospital-ona ra·angahachim. Indake ong·genchimoba officer Amit Sinha-de siaha ine doctor parakaha, unomitingo Digvijay Singh-kode da·omiting hospitalo sana bananiko dakenga.
Kobor man·a joljolan a·sel ong·anirangko sandirokna gita Ri Bhoi-ni dolsa police New Delhi-ona re·angaha. Indake Amit Sinha-ni manggisiko uni songtang Dakhingaon, Guwahati, Assam-ona ra·bana gita kamrangko ka·enga.
Amit Sinha, unaskango, Ri Bhoi Police-ni Crime Branch-ona watatna skang ua Khapmara PIC in-charge ong·achim aro Byrnihat Police Outpost-oba kam ka·angahachim.
