NONGSTOIN: West Khasi Hills a·jani Maweit songo donggipa Coal India Limited (CIL) depot-o koelarangko chimongani aro koelarangko dakkiani namen dingtanggrikani gimin ia jolrango songdongenggipa manderang, ia biapo chimonggipa koelarangko dakkiani bidingo sing·doattokaha.
Maweit-o CIL-ni depot-ko kuliani gimin sing·doatengon, ia depot-o koelarang metric ton 2000-mangni gitasan dongaiachim indide maikai a·dok sorkarini koela dakkianiara MT 34,000-mang ong·angpilskaaha ine jolni manderang, koela hisapgipa magistrate aro DMR inspector-ni kamko sing·doataha.
Ia Maweit CIL depot-o maikai dakkigipa koelarangna on·gipa challan-rangchi, niam gri bikotgipa koelarangko salrurana man·gen, uandake dakkigipa koelarangko bang·bate mesokna jotton ka·aha ine iana skang kobor on·timgiparang u·iatahachim.
Kobor on·timgiparangni parakatani gitade, ia depot-o da·o dongenggipa MT 2000 ba 3000-mangni gita koelarangnaba CIL-ni maming niamrangkon ja·rikjahachim.
“Koela a·koloni depot-ona koelarangko CIL-ni donatgimin manderangna salrurana man·a aro weigh bridge-ni weight challan-rangkoba nangchongmotachim indiba ia niamrangko ja·rikjaha,” ine kobor on·timgiparang aganaha.
“Ia depot-o chimonge donenggipa koelarang dam 100-oni dam 150-mangba ong·jawa, uni gimin koelarang MT 2000-ba ong·janaba gnangchim indiba uamang MT 34,000 koelarangko dakkie galskaaha,” ineba kobor on·timgiparang parakataha.
Maweit-ni CIL depot-o koela dongani aro dakkie galgipa koelarangko mesokanio namen dingtanggriikani gimin kobor on·timgiparang, magistrate aro DMR inspector-ko sing·doataha.
