SHILLONG: Meghalaya Lokayukta-ni official sakgittamko sorkarini kam ra·galahani gimin Trinamool Congress (TMC)-ni dilgipa aro a·dokni gitcham Chief Minister Mukul Sangma sing·doatenba, Lokayukta-ko jakgitele aro bil gnange kam ka·na on·na nanga ine parakataha.
Iani bidingo kobor ra·timgipa manderang baksa agangrikengon, “Mai miksonganio Meghalaya Lokayukta-ko donahachim? Ian niam pe·giparangko champengna dongimin bimangsa ong·ani gimin uamangko jakgitele aro bil gnange kam ka·na on·na nanga,” ine Sangma aganaha.
Lokayukta-ni official-rang, kamtangtangko jakgitele aro bil gnange ka·na man·ja ong·ode niamna kenanian dongjawaha ineba Sangma aganaha.
“An·chingni gisepo niamna kenaniko nangchongmota aro iani giminsa niamrangko donaha. Niamna kenani dongode, dilgiparang aro manderangni gisepo namgipa janggi tanganiko aro niam ja·rike janggi tanganiko nikna man·gen,” ine ua aganaha.
Meghalaya Lokayukta-ni official sakgittamko sorkarini ra·galani gimin janapatengon, ia official-rangko mai miksonganio sorkari ra·galaha ine TMC parliamentary party-ni dilgipa sing·doataha.
Garo Hills Autonomous District Council (GHADC)-o da·o ong·enggipa NPP MLA-ni tangka jakkalsretaniko parakatani ja·man a·dok sorkari, Lokayukta-ni Investigation Officer sakgittamko Whatsapp message gita kam ra·galatahachim ine nikna man·a.
Ra·gala man·gipa official-rangara, Inquiry & Prosecution-ni Director (gitcham IPS officer) J Rymmai aro Inquiry-cum-Investigating Officer sakgni R Pde aro Anil K Sangma ong·achim.
Ra·gala man·gipa officer-rangni biapo sorkari, IAS officer IW Ingty-ko Inquiry & Prosecution-ni Director songe, MPS officer sakgittam, chong·motan Chalang G Momin, John C Sangma aro Baniateilang Diengngan-ko membor-na songskaahachim.
