SHILLONG: Meghalaya a·dokni bang·bata skul aro college-rangon fee-rang nangana bate rakdugaengani gimin Sombar salo, Leader of Opposition (LO) ba Opposition dolni Ronnie V Lyngdoh, an·tangni suk ong·gijaniko parakatenba, skul aro college fee-rangko komie ra·na gita niamko tarichina a·dok sorkariko didiangaha.
Assembly-ni Budget Session-o Governor-ni aganprakgipani bidingo chanchirimaniko ra·baengon, skul aro college-rango fee-rangko rakdugae ra·engani a·sel a·doko songdongenggipa manderang neng·nikanirangko chagrongna nangtokenga ine skul aro college fee-rangko komie ra·na gita niamko tarichina Lyngdoh, a·dok sorkariko didiataha.
“Meghalaya a·doko college-rang, mongsongbate tangka paisani gita sorkarini dakchakanirangko man·enggipa college-rango fee-rangko komie ra·na a·doko niamrang dongna nangenga. College fee-rang rakdugaengani a·selan an·chingni ma·a paarang dedrangko college-rango watanio neng·nikanirangko man·na nangenga aro poraianiko dontonganirangba batroroenga,” ine Lyngdoh aganaha.
A·doko lekka porako namdapatna gita sorkarini ja·ku de·anirangna mittelpilangengon, “Badiaba college-rangode admission fee-rang 20,000-oni 30,000-mang ong·pilengani a·sel ma·a paarang namen sko sana nangenga aro dedrang sakgni sakgittam dongpagiparangde sko sana nangbatenga. Iani giminsa admission ra·ani somoirangode bang·a manderangan an·chingona dakchakanirangko bi·na re·batokenga aro iako an·ching pilakan ma·sia,” ine Congress Legislature Party (CLP)-ni dilgipa parakataha.
Lekka pora dontonganiko namatna gita sorkari ja·kurangko de·enga indiba sorkari college-rangko kulina jotton ka·ani ba janapanirangkode ua nikjaenga ineba Lyngdoh aganaha.
