Baljek Airport-o sildorengrangko chalaina gita dakkigiparang dongkuja

SHILLONG: West Garo Hills a·jani Jengjal-o donggipa Baljek Airport-o chonchongipa sildorengrangko chalaina dakkigipa dolrang dongkujaengani gimin ia airport-ko jakkalgija galchipe donna nangkuenga ine Mongolbar salo, a·dokni Deputy Chief Minister aro Transport Minister Sniawbhalang Dhar parakataha.
Assembly-ni Budget Session-o Ampati-ni TMC MLA Miani D Shira-ni sing·anina aganchakaniko on·angengon, Baljek Airport-ko chalaiani bidingo a·dokni Chief Minister, bang·en chittirangko sedoatahachm indiba Civil Aviation Ministry-oni aganchakaniko on·atani gitade, ia airport-o chonchongipa sildorengrangko chalaina gita dakkigipa dolrang dongkujaenga ine Dhar parakataha.
Iani bidingo an·tangni suk ong·gijaniko parakatengon, Baljek Airport-o chonchongipa sildorengrangko watna man·na gita ua jotton ka·enga ine Transport Minister parakataha.
Iana skang, ia Baljek Airport-ko maini a·sel da·alonan chalaina man·chipkujaenga ine Ampati MLA-ni sing·anina aganchakaniko on·angengon, ia Airport-o ATR sildorengrangko jakkalna gitaba chu·gimik biaprangan chu·ongkujaenga ine Dhar parakataha.
Baljek Airport-ko chalaina man·na gita 2013 bilsion a·dok sorkari, acre 50 a·arangko ra·dapahachim indiba biaprang sildorengrangko chalaina gita chu·ongkujaengachim aro Dhar-ni aganani gitade, Baljek Airport-ko chalaina gita Airports Authority of India (AAI), a·arangko bi·dapkuengachim.
“Chinga ia airport-ko chalaina gita jotton ka·enga indiba acre 60 a·arangko man·dapkujaskalde ia airport-o ATR sildorengrangko chalaina man·kujawa,” ine Transport Minister aganaha.
Koborko on·ani gitade, ia airport-o acre 60 a·arangko ra·dapna kamrangko ka·engaha aro uni ja·mansa ia airport-ni nangchongmotgipa kamrangna AAI-ko DPR watatchina aganatgen.
Ia chanchirimanio, Nongthymmai-ni MLA Charles Pyngrope-ba bakko ra·angpae, airport-ko chalaina gita badita a·arangko nanga ine sing·on, da·o dipet ia Airport-ni apalani acre 120-mang ong·a aro airport-ko chalaina gita acre 60 a·arangko nangdapenga ine Dhar talataniko on·angaha.
Airport-ni runway-ko bakrodapatani bidingo sing·anina aganchakaniko on·angskaengon, da·o dipet ia Baljek Airport runway-ni bakroani metre 1100 ong·a aro ia airport-o ATR-rang bilonna man·na gita ia runway-ko metre 1750 ong·e bakroatna nangenga ine a·dokni Deputy Chief Minister aro Transport Minister parakataha.