SHILLONG: Assam aro Meghalaya Sorkarini, kajia golmal gnanggipa sima tik ka·kugija donggipa kamrangko chu·sokatna agangrikaniko dakanio ja·manchakenga, maina regional committee-rangan, tom·e chanchianiarang aro biap-bichamona re·ange nianirangan batanggimin somoirango dongkuja gitan dakenga.
Indake ong·engon, Deputy Chief Minister Prestone Tynsong, jean Ri Bhi Regional Committee-ni chairman-ba ong·engachim, ua aganaha je Assam Sorkaride Committee-o sakgittam chairman-rangko donaha jeon Meghalaya-de Committee-o apsan chairman aro memborrangkon donaiaha.
“Basakobara chinga joka, uamang jokja dakenba ja·donggaatanirangko man·enga indiba chinga, iarangko bakan namatgen,” Dy CM Tynsong aganaha.
Ru·uta bilsirangna a·dok damgnini gisepo sima tik ka·grikna man·gija donenggipa kajia-golmal gnanggipa dam chi·gni biaprangoni damdokko re·anggipa chango sima tik ka·aha, jeon badia biaprangode namemancha ong·srangade ong·kujachim, indake dongspa damdok biaprango sima tik ka·ani bidingo Assam aro Meghalaya a·dok damgnini gisepo agangrikaniko a·bachengtaiengahachim, indiba mitam biaprango sima ario songdonggipa manderangni kosako Assam police-ni jakdangdikani a·sel agangrikanirang ja·manchakaha.
Assam Police-ni ka·saninggija daka kamrangni bidingo House-o sing·anirangna aganchakengon, Assam police-ni kosako matnanganirangko sandie nienga indake chonchongipa neng·nikanirangni giminba A·dok damgnini CM-rang antio komibeoba changgni ba changgittamde agangrikrongenga, Tynsong aganaha.
