TURA: North Garo Hills a·jani Adokgre C&RD Block-ko 2022 bilsion songe on·ahaoba da·alonan office-ko chalaikujaengani gimin A·chik Holistic Awakening Movement (AHAM) Adokgre unit, a·dokni Chief Minister Conrad K Sangma-ko sing·doatenba, jolo songdongenggipa manderangni namgnina ia office-ko ta·raken chalaichina didiataha.
Adokgre C&RD Block-ko 2022 bilsini November jaon a·dok sorkari songe on·angahachim aro ia block-ko songahani gimin Adokgre jolrango namgnirangko man·na gita songni manderang ka·dongsotokengahachim. Indake ong·genchimoba ia block-ko songaoni da·o bilsisa batangpilahaoba maming kamrangkon ia gital block-oni ka·kujaengani gimin AHAM Adokgre unit-ni membor-rang suk ong·gijaniko parakattokaha.
Adokgre songona C&RD Block-ko ra·bae on·ahani gimin a·dokni Chief Minister-ko mittelpilangengon, ia block office-ko da·onan a·bachengatskakujaengani gimin AHAM-ni dilgiparang suk ong·gijaniko parakataha.
Adokgre jolo dam 43 songrang aro te 10,000-na baten nokdangrang donga ine janapatengon, ia nokdangrangoni 99 percent-mangni gitade Below Poverty Line (BPL) nokdangrang ong·a ine AHAM Adokgre unit parakataha.
“Ia nokdangrangoni bang·batan game ge·e cha·pagiparangsa ong·a aro Adokgre block office-ko chalaikujaengani a·selan songni manderang, an·tangtangni dingtang dingtang nangchongmota kamrangna kilometre 30 ramako songreange Kharkutta block-onasa re·angna nangkuenga. Ia block-ko songe on·ahani gimin Adokgre jolo songdongenggipa manderang pilakan, an·tangtangni kamrangko ka·na altubatgnok ine ka·dongsotokpaengachim indiba da·onan ia office-ko chalaikujaengani gimin manderang suk ong·tokjaenga,” ine AHAM Adokgre unit-ni president Marchborn Marak parakataha.
