SHILLONG: Meghalaya a·dokni skanggipa state university, chong·motan Captain Williamson Sangma State University-ko chalaina gita a·dok sorkari kamrangko ka·chakataha ine Budbar salo, a·dokni Education Minister Rakkam A Sangma parakataha.
Budget session-ni brigipa salo Assembly membor-rangni sing·anina aganchakaniko on·angengon, ia university-ni Tura campus-na ge 100 kamrangko aro Shillong campus-na ge 6 kamrangko ong·katdapatna sorkari kam ka·engaha aro iana bilsiprako gong kror 45.7 korosko nangdapna sienga ine Education Minister parakataha.
Ia State university-ni vice chancellor-ko songna gitaba kamrangko ka·engaha ine Sangma aganaha.
Education Minister-ni parakatani gitade, Captain Williamson Sangma State University-ko 2024 bilsini gisepon a·bachengatna sorkario miksonganirang dongachim indiba da·o Lok Sabha election dongani gimin university-o kam ka·nagiparangko ia bilsini gisepo ra·na man·jagenchimode ia University-ko 2025 bilsioni a·bachengatskanaba gnang.
Captain Williamson Sangma State University-ko rikanio da·o dipet gimik gong kror 16.96 tangkarang koros ong·aha ine talataniko on·angengon, ia university-ni administrative block, academic block, boys hostel aro girls hostel-rangko rikani matchotmanaha ine Sangma parakataha.
Ia university-ni vice chancellor aro registrar-ko man·chape ge 58 kamrangkode sanction ka·manaha ineba ua aganaha.
Captain Williamson Sangma State University-na internal road aro water supply-koba sanction ka·manaha ine talatangengon, “Ia university-ni Board of Governors-ko songahani gimin ia board-ni skanggipa tom·aniko 2022 bilsini January 14 tariko, Education Minister-ni dilanichi ong·ataha,” ine Sangma parakataha.
