SHILLONG: Meghalaya a·doko Jal Jeevan Mission (JJM)-ni kamrang namen chu·sokgipa ong·enga ine a·dok sorkari a·kangengoba, bang·a songrangon JJM-ni kamrangko a·bachengatani ja·man chirangko man·tokjaengaha ine matnanganirangko knasona man·ahani gimin North Shillong-ni Voice of the People’s Party (VPP) MLA Adelbert Nongrum, Assembly-ni budget session-o an·tangni suk ong·gijaniko parakangaha.
Ma·mong sorkarini ra·gatgipa JJM-ni kamrangko a·dok sorkari name chu·sokatenga ine a·kangengani gimin sing·doatengon, songadam nokadamrangona re·ange nigenchimode JJM-ni kamrang maming namgnirangko ra·bana man·jaenga inesa nikskana man·enga ine Nongrum parakataha.
VPP MLA-ni aganani gitade, Meghalaya a·doko 74.60 percent nokdangrangna chi pipe-rangko sale on·na man·aha aro JJM-ni ning·o nisan ka·enggipa te 6,51,412 nokdangrangoni te 4,85,927 nokdangrangde chi pipe-rangko man·aha ine JJM-ni dashboard-o janapahachim.
“Iako sorkari ra·chakeng ra·chakjaeng indiba kakketde iasa ong·skaenga, chong·motan songadam nokadamrango GI pipe-rangko da·osa salenga indiba nokdangrangonade sokkuja ba chi pipe-rang nokni rikamrangonade sokengaha indiba nokonade soksrangkujaenga ba pipe-rangde nokdangrangona sokengaha indiba uko watgipa tap-rang dongkuja. Kakketko agangenchimode bang·bata nokdangrangon chirangko man·srangkujaenga,” ine Nongrum aganaha.
Chirangko man·jaengani a·selan garirango chirangko badinge cha·enggipa manderang man·e cha·tokenga ine janapatengon, a·doko JJM-ni kamrang chu·sokgipa ong·jaenga ine sorkari ku·rachakgenchimoba darangba mamingkoba aganjawachim ine VPP MLA aganaha.
“JJM-ni kamrangko bang·bata biaprangon matchotjaenga ine nikengoba sorkari, contractor-rangna chu·gimik tangka paisarangko gamengama?” ineba ua sing·doataha.
Iana aganchakaniko on·angskaengon, Meghalaya a·dokni songadam nokadamrango chi pipe soke man·giparang te 4550 (0.7%) nokdangrangoni da·o 4,85,927 (74.60%) nokdangrangona tang·doangahani gimin a·doko JJM-ni kamrang namen chu·sokgipa ong·aha ine a·dokni PHE Minister Marcuise N Marak parakataha.