SHILLONG: Re·anggipa jao, Rongjeng-ni driver saksako so·ote Mendima Forest Reserve-o galanganio jak donggipa mande sakgittamko North Garo Hills a·jani police-rang rim·na man·aha.
Iako Budbar salo, a·dokni Home Minister Prestone Tynsong, Kharkutta-ni MLA Rupert Momin-ni sing·anina Assembly-o aganchakaha.
Rim·a man·gipa mande sakgittamko da·o judicial custody-o donenga ineba Tynsong parakataha.
“Ia a·selko North Garo Hills a·jani police-rang chone ra·jaenga aro ia a·selni bidingo kamrangko matchotate, sianggipa mandeni nokdangna kakket bichalko on·na jotton ka·enga,” ine Home Minister aganaha.
Ia mandeni manggisiko man·gipa rama gita bang·a changon ong·gija dakgipa manderang, Assam-ona re·angna aro re·bapilna jakkalronga ine janapatengon, ia jolo iandakgipa a·sel ong·ani ian skanggipa chang ong·ja ine dos dakgipa manderangni kosako rakbatsranggipa sastirangko on·chinaba Kharkutta MLA, a·dok sorkariko didiangaha.
Re·anggipa January jani 13 tariko, Rongjeng-ni Udoy M Sangma minggipa mandeni gariko mande sakbonga, Shallang-oni Dudhnoi-ona para ra·angahachim aro ua somoionin ia mande, noktangona sokangpiljahachim.
