SHILLONG: Meghalaya a·doko matburingrangni chadrapanirangchi sianggiparangna compensation-ko gong lak 5-oniko gong lak 10-ona bariataha ine Budbar salo, a·dokni Chief Minister aro Forest & Environment department-niba Minister ong·enggipa Conrad K Sangma, Assembly-o parakataha.
Budbar salo, Ranikor constituency-ni UDP MLA Pius Marwein, da·ororo a·dokni dingtang dingtang biaprango mongmarang, manderangni dongchakgipa biaprangona re·ange manderangko aro manderangni gam-jinrangko nisie galrongengani gimin suk ong·gijaniko parakangenba, manderangko chel·chakna gita sorkari mai ja·kurangko de·enga aro sianggipa mandeni nokdangna mai dakchakanirangko on·enga, uko ma·sie ra·na gita sorkariko sing·doangahachim.
Uni sing·anirangna aganchakaniko on·angengon, mongmarangni giminsan ong·aigija a·doko donggipa pilak matburing aro do·o-matrangni giminba am·sandianirangko dakenga ine Chief Minister parakataha.
Matburungrangni chadrapanirango sianggiparangna sorkari, compensation-ko gong lak 5-oni lak 10-ona bariataha ineba Chief Minister talataniko on·angaha.
Da·o dipet Meghalaya a·doko mang 1800-mangni gita mongmarang, Assam aro Meghalaya a·dokni gisepo re·rurae dongenga ineba Sangma aganaha.
