SHILLONG: Mawmluh Cherra Cements Limited (MCCL)-ko chipani bidingo a·dok sorkari chanchipiltaiengkua ine Budbar salo, a·dokni Deputy Chief Minister aro Commerce & Industries Minister Sniawbhalang Dhar, Assembly-o parakataha.
Budget session-ni brigipa salo, Nongkrem-ni VPP MLA Ardent Miller Basaiawmoit-ni sing·anina iako Minister aganchakaha.
MCCL-ko sorkarini chipna tik ka·engani a·sel ia karkanao pangchake janggi tangenggipa dol 270 nokdangrangna neng·nikanirang ong·enga ine iana skang, Assembly-ni Opposition MLA-rang, suk ong·gijaniko paraktokahachim.
MCCL-o komibeoba sak 278 manderang kamrangko ka·e cha·tokengachim indiba ia karkanako 2020 bilsionin chipe donengahachim ine nikna man·a.
MCCL-ara 1960 bilsirango Sohra-o a·bachengatgipa cement company ong·e a·doko gitchambatsranggipa aro a·dokni damsamangmang company ong·achim indiba ia company-ko chalaianio bang·en noksan ong·atako man·ahani gimin ia company-ko chalaianio neng·nikanirangko chagrongna nangahachim.
Opposition MLA-rangni sing·anirangna aganchakaniko on·angengon, dingtang dingtang dolrang baksa chanchirimchengani ja·man a·dok sorkari, MCCL-ni bidingo ja·kuko de·anggen ine Dhar parakataha.
“A·dokna aro a·doko songdongenggipa manderangni namgnina chanchiesa chinga ja·kurangko de·gen,” ine ua aganaha.
MCCL-o kam ka·giparangna sorkari, VRS-ko on·na miksonganirang dongama ine iana skang Nongthymmai-ni MLA Charles Pyngrope-ni sing·anina aganchakaniko on·angengon, iana sorkari cholrangko nikuenga ine Commerce & Industries Minister parakataha.
MCCL-ko chipe donengani a·sel karkanao kam ka·giparang neng·nikanirangko chagrongna nangtokenga ine iani bidingo ta·raken chanchienba ja·kuko de·china gita Opposition dolni dilgipa Ronnie V Lyngdoh-ba sorkariko aganaha.
