SHILLONG: Meghalaya a·doko sak 175 dilgiparangko, dingtang dingtang board-ni chairman, vice chairman, deputy chairman aro sorkarini adviser ba dingtang dingtang gadangni kamrango rakkianichi a·dok sorkari bang·bea tangka paisarangko koros ka·e galna nangengon, ia dilgiparangko kamo rakkianio ‘maming ong·gijani dongja’ inesa a·dokni Chief Minister Conrad Sangma aganskaaha.
Sorkarini dingtang dingtang kamrango rakkiako man·gipa sak 175 dilgiparangoni mitamrangde gital aro gitcham MLA-rang, MDC-rang aro gipin politician-rangba ong·a aro uamangoni bang·batan Category A+, A aro B Category-ni ning·o rakkiako man·enggiparangsa ong·e, bang·en dormaharang baksana gipin man·gnirangkoba man·tokengachim.
Dingtang dingtang chairman, co-chairman, vice chairman aro deputy chairman gita dakgipa gadangni kamrangna re·anggipa bilsiosan a·dok sorkari, man·gnirangko aro dingtang dingtang cholrangkoba bariatahachim aro uandaken A+ gadango rakkiako man·giparang japrako gong 20,000/- dormaha baksana jaantian petrol/diesel litre 250, una on·gipa garini korosna gong 15000, indin sanna banani cholrang aro uandakgipa man·gnirangko da·o man·engahachim. Apsan daken A, B aro C category-o rakkiako man·gipa manderangba dingtang dingtang man·gnirang dongachim.
Ia dilgiparangna jaantian indita koros aro gipin cholrangko on·engoba ia dilgiparangko rakkianio maming ong·gijani dongja aro pilak sorkarion apsan dakgipa bewalkon ja·rika inesa a·dokni Chief Minister aganskaaha.
Batanggimin sorkarirangba apsan daken an·tangtangni dilgiparangko, dingtang dingtang kamrango rakkiaha ine janapatengon, ia kamrango rakkiako man·gipa manderangna ong·enggipa korosangchide a·dokna koros ong·anio indita neng·nikani ong·ja ine Chief Minister aganaha.
Iani bidingo talataniko on·angengon, onbatgipa gadangni dilgiparangko sorkarini bak ong·atna gitasa dilgiparangko iandakgipa kamrango sorkari rakkironga ine Chief Minister parakataha.
