‘M’laya a·dokna ADC-rangko nangchongmota’: CM
SHILLONG: Meghalaya a·dokni autonomous district council (ADC)-rangara a·dokna namgni ong·ani pal batesa tangka paisani gita boja ong·enga ine agananiko Bristibar salo, a·dokni Chief Minister Conrad K Sangma jegalatenba, Meghalaya a·dok gita Tribal-rangni songdongchakgipa biaprango manderangni daka rikanirangko aro biaprangko chel·chakna ADC-rangko chalaina nangchongmota ine parakataha.
“ADC-rang tangka paisani gita boja ong·enga inakode anga ong·e nikja maina an·chingni daka rikani, an·chingni a·a-chiarango bil man·ani, iandakgipa kamrango district council-rangsa mongsonggipa kamrangko ka·gipa ong·a,” ine Sangma aganaha.
ADC-rangara namen nangchongmotgipa bimangrang ong·a ine janapatskaengon, a·doko district council-rangko done name chalaiangkuna on·na nanga ine Chief Minister parakataha.
“Chalaiani bewal aro ADC-rangni ning·o kam ka·anikosa namdapatna nangenga. ADC-rango tangka jakkalani aro uandakgipa dingtang dingtang kamrango nambate kamrangko ka·na nangenga,” ine Sangma aganaha.
ADC-rang an·tangtangan kajinarangko man·anio bariataniko chanchina nanga ineba Chief Minister aganaha.
“KHADC-ni kamrangko niatgenchimode uamango kam ka·giparang komibata indiba a·doko nambate chalaienggipa council ong·enga. Uni gimin ia pilakkon name nichengesa ja·kurangko de·na nanggen,” ine ua aganaha.
GHADC aro JHADC-o kam ka·enggiparangna dormaharangko on·na man·jaengani gimin janapatengon, “Sorkari je chol man·achide uamangna dakchake on·enga indiba angni agangimin gita ADC-rangara an·tangari jakgitele chalaigipa bimangsa ong·ani gimin dormaharangko on·anide uamangni jakosa ong·a aro uamang an·tangtangan tangka paisani kamrangkode simsakna nanga,” ine Chief Minister aganaha.
ADC-rangna sorkari dakchakanirangkode on·na man·a indiba dormaha on·ani daitoko sorkaride jako ra·na man·ja ineba ua talataniko on·angaha.
“Indiba chinga ADC-rangna dakchakanirangko on·na cholrangkode sandienga aro chinga maiko dakna man·a uko nigen. Ia damgni district council-rango batanggimin bilsigni ba gittamni gisepo baditaba jarangni dormaharangkode on·na man·aha,” ine Sangma aganaha.
GHADC-o kam ka·enggiparangni dormaharangko man·gija da·o ja 32 gappilengahachim ine nikna man·a.
