SHILLONG: Jal Jeevan Mission (JJM)-ni kamrangna jakkalenggipa plastic pipe-rangara ramram plastic-ni pipe-rang ong·ja indiba ma·mong sorkarini certify ka·gimin UPVC minggipa pipe-rangsa ong·a ine Bristibar salo, a·dokni PHE Minister Marcuise N Marak, talataniko on·angaha.
Da·o ong·atenggipa Assembly-ni budget session-o Umsning constituency-ni Congress MLA Celestine Lyngdoh-ni sing·anirangna aganchakaniko on·angengon, UPVC pipe-rangko JJM project-ko a·bachengata intalan tariaha aro ia pipe-rangara ramram plastic-ni pipe-rang ong·ja ine PHE Minister parakataha.
Songadam nokadamrangni buringrango wa·alrang kamrongani gimin JJM-ni kamrangna plastic pipe-rangko jakkalaniara kragijani ong·enga ine Congress MLA, an·tangni suk ong·gijaniko parakahachim.
Nekikona jolo JJM-ni kamrang matchotkujaenga ine matnangenggipana aganchakaniko on·angskaengon, ia songrango JJM-ni kamrangna a·arangko ra·anio ja·manchakahani a·selsa kamrangko a·bachengatanioba ja·manchakaha indiba da·o kamrangko ta·raken ka·engaha ine PHE Minister talataniko on·angaha.
Mawlai constituency-o JJM-ni kamrangko nipilanio MLA-ni nangnikanirangko nichanggala ine matnanganirangna aganchakaniko on·angskaengon, “Ua nipilani kam ong·jachim indiba songni nokma aro a·a nokgiparangni NOC-rangko man·jahani a·sel chinga badiaba badiaba chidikrango chatna man·jaesa Mawlai project-de ja·manchakatako man·aha. Jolni MDC-de re·bae angna dakchakaniko on·eahani gimin anga uni dakchakaniko ra·aha. MLA-ni dakchakanikoba anga man·ode kusi ong·begenchim,” ine Marak aganaha.
Indake ong·engon, JJM-ni matchotgimin bang·bata biaprangon chirangko chu·onga gita man·jaenga aro chirangko chu·onge on·genchimode uan nambatgipa ong·gen ine Opposition dolni dilgipa Ronnie V Lyngdoh-ba aganaha.
