TURA: Matchu, sam, merong, chini aro ba·ra kancha gita dakgipa ma·manti bosturangko Bangladesh a·songona badingsrukengani a·sel Garo Hills-o iandakgipa bosturangni dam tang·doenga ine A·chik Organisation for Social Welfare (AOSW) Songsak circle parakatenba, Bangladesh a·songona bostu badingsrukaniko champengchina sorkariko didiataha.
Iani bidingo East Garo Hills, North Garo Hills aro South Garo Hills a·jani Deputy Commissioner-rangna badi ka·e sedoatengon, Bangladesh a·songona badingsrukatenggipa manderangko aro bosturangko BSF aro police-rang bang·en rim·engoba, Garo Hills-ni sima gita Bangladesh a·songona bostu badingsrukaniko dontongkujaenga aro batanggimin jarango iandake Bangladesh a·songona bostu badingsrukanirang batroroenganichi a·dokna noksan ong·aniko ra·baenga ine AOSW Songsak circle-ni president John Techang Ch Marak parakataha.
Manderangni nangchongmotgipa bosturang, jekai merong, chini aro uandakgipa bosturangko Bangladesh a·songona badingsrukatengani a·sel a·doko iandakgipa bosturangni damrang tang·doskaenga aro ramram manderangsa neng·nikanirangko chagrongna nangtokenga ineba AOSW Songsak circle parakataha.
“Uni manderangni neng·nikanirangko aro a·dokni noksan ong·aniko chel·chakna gita Bangladesh a·songona niam gri bostu badingsrukaniko ta·raken champengatchina chinga didienga,” ine AOSW Songsak circle-ni president, a·ja damgittamni DC-rangna seatgipa chittio parakataha.
