SHILLONG: Lokayukta-ko chu·gimik chalaina gita a·dok sorkari, 2021 bilsion Meghalaya Lokayukta Act-ko taridapaha ine Bristibar salo, a·dokni Chief Minister Conrad K Sangma parakataha.
Assembly session-o North Shillong-ni MLA Adelbert Nongrum-ni sing·anirangna aganchakaniko on·angengon, gitcham Meghalaya Lokayukta Act-o chairman baksana membor sakbriko nange, 50 percent-de judicial-onisa ong·na nangani gimin Meghalaya Lokayukta-ko chalaina man·kujaengachim maina chairperson ba membor sakbrioni saksani biapba bangbang ong·genchimode Lokayukta-ko chalaina man·jachim ine Chief Minister parakataha.
“Taridapgimin Meghalaya Lokayuka Act-ko 2021 bilsio Meghalaya Assembly ra·chakaha aro Lokayukta-ko chalaina miksonganiosa ia Act ba niamko taridapaha. Meghalaya Lokayukta Act 2014-ni Section 3 (2)-o, chairperson baksana membor sakbri donggenchimosa Lokayukta-ko chalaina man·na ingipa niam dongani gimin ia bangbang ong·gipa biapko gapatna gitasa 2021 bilsio ia Meghalaya Lokayukta Act 2014-ko taridapaha,” ine Sangma aganaha.
Guwahati High Court-ni Judge (Retd) Justice PK Musahary-ni Lokayukta chairman ong·engmiting somoio uni pass ka·gipa niamko Meghalaya High Court-o ra·bigipa dongani gimin ia niamrangko taridapna nangaha ineba Chief Minister aganaha.
Chief Minister-ni aganani gitade, ua somoio Lokayukta-ni chairman-kosan songaiahani gimin chairman saksanchide Lokayukta-ko chalaina man·jawa ine iani bidingo a·dok sorkariko aganchakchina gita Meghalaya High Court-ni Division Bench-ba ge·etaniko on·aha.
Sikkim, Haryana, Jharkhand, Himachal Pradesh, Tripura aro uandakgipa a·dokrango Lokayukta-ko chalaiani bewalko nion, ia a·dokrangoba membor saksanchi bimang ong·atesa chalaia ine nikna man·aha ineba Chief Minister parakataha.
“Uni giminsa 2021 bilsio Meghalaya Lokayukta Act 2014-ko taridapaha aro da·o a·doko Lokayukta-ko chalaina man·aha,” ine Sangma aganaha.
Ia taridapgimin niamko Meghalaya High Court-ni Division Bench-ona ra·ange, ia niamko ra·chakahaon, a·doko Lokayukta chalaina a·bachengaha ineba Chief Minister parakataha.
Indake ong·engon, da·o ong·enggipa Lokayukta-ni chairperson, 2022 bilsini February 1 tariko kamtangko jako ra·aha aro Lokayukta-ni secretary, jean Meghalaya sorkario secretary-ni gadango ong·achim, uko a·dok sorkarini ku·pattianio pangchake Lokayukta-ni chairperson, secretary-ni kamo songe on·skaaha ine Chief Minister parakataha.
Meghalaya Lokayukta-ni inquiry wing-koba Meghalaya Lokayukta Act-ni section 11 ning·o songaha aro ia wing-ko a·dok sorkario additional secretary-ni gadango ong·enggipa Inquiry Director dilenga ineba Sangma aganaha.
“Unbaksana Prosecution Director aro Inquiry Wing-ni officer-rangkoba songaha,” ine ua aganaha.
