SHILLONG: Re·baenggipa 2027 bilsi mangode Secretariat building aro gipin administrative building-rang administrative city New Shillong Township-osa ong·gnok ine ka·dongsoenga.
New Shillong Township-o administrative city aro knowledge city-ko rikna a·bachengengaha indake ia bilsini Lok Sabha election ja·man DPR, design aro tender-rangko matchotatgen ine ka·dongsoenga.
Janapgimin administrative city-ona ramarangko tarina gita tangka-paisa chamani aro tender-rangko on·ani giminde matchotangjok.
Indaek ong·engon, re·baenggipa September-October ja mangode kamrangko a·bachengna on·gnok aro gital Secretariat-ko rikani kamrangko mikkang bilsi gnigipa ba gittamgipa quarter-oni a·bachengatskanaba donga ine Chief Minister Conrad Sangma aganaha.
Gitalgipa Secretariat aro gipin administrative-ko rikna gita ian Sorkarina rakbegipa kam ong·a indakoba project-na daarigen aro komibeoba mikkang 2027 mangode Secretariat-ko rika matchotatna krenggen, Pa Sangma aganaha.
Knowledge city-na kror 5000 mangko aro Secretariat-na kror 500-600 mangko koros ka·gen. Kror 1600 mangko chirangko salna aro kror 300-ko jolni ramarangko tarina koros ka·gen.
