TURA: South West Khasi Hills a·jani Khonjoy, Moheskola aro Bagli jolrango government college-rang dongkujae chatro chatrirang neng·nikanirangko chagrongna nangtokenga ine A·chik Holistic Awakening Movement (AHAM) SWKH Zone parakatenba, ia jolrango donggipa chatro chatrirangni namgnina Khonjoy aro Moheskola jolrango government college damsako kulie on·china a·dok sorkariko didiataha.
Iani bidingo a·dokni Chief Minister Conrad Sangma-na sedoatengon, South West Khasi Hills a·jani Khonjoy, Moheskola aro Bagli jolrangara Bangladesh a·songni simao donggipa songrang ong·e lekka porani gita cholrang namen komiani a·sel chatro chatrirang, chel·begipa biaprangona re·angesa poraina nangtokenga ine AHAM SWKH Zone parakatenba, ia jolrango donggipa chatro chatrirangni namgnina ia jolo government college damsako kulie on·china didiataha.
“Ia jolrango govt college-ko kulie on·genchimode chatro chatrirang, chel·a biaprangona re·rurae poraina nangtokjawachim aro poraianirango korosrangba komigenchim. Ia biaprangona govt college-ko ra·baanichi chatro chatrirangni janggi tanganio dingtanganiko ra·bana man·chongmotgen,” ine AHAM SWKH zone-ni president Crownbetter T Sangma parakataha.
Khonjoy Primary Health Centre (PHC)-ko Community Health Centre (CHC)-ona ra·doatchina gitaba AHAM SWKH zone, a·dok sorkariko didiataha.
“Batanggimin bilsirango Khonjoy aro uni wilwilao donggipa dingtang dingtang songrango manderangni jelbra jelsuani namen bataha aro Khonjoy PHC indita sak manderangna sanna bananirangko on·anio neng·nikanirangko man·na nangengaha. Ia PHC-ko CHC-ona ra·doatgenchimode, manderangna nambate sanna bananirangko on·na man·an baksana indita bang·bea manderangko sanna bananio altubatataniko man·gen,” ine AHAM SWKH zone-ni president parakataha.
Indake ong·engon, Bagli aro Moheskola songrango game ge·e aro bading chiwale cha·enggipa manderangni janggi tanganiko tang·doatna gita ia jolo international market-ko kulichina gitaba AHAM SWKH zone, a·dok sorkariko didiataha.
