Matnanganirangko nirokatchina PHE minister-ko didia
SHILLONG: A·dokni BJP vice president aro Tura MDC, Bernard Marak, Garo Hills a·jolo Jal Jeevan Mission (JJM)-ko cha·bokenga ine agane PHE Minister, Marcuice Marak-ni chanchianiona ra·baaha.
Minister-na segipa chittio, BJP vice president indake aganaha, “Nangni constituency-ni ning·o ga·akgipa songrangko man·chape Garo Hills-o Jal Jeevan Mission (JJM)-ko ka·sapae nirokchina anga nangko mol·molna ska. Garo Hills-o songdonggipa songnokni manderang jean songni manderangna skanggipa nanggipa ringna namgipa chiko man·anio namen neng·nikaniko chagrongenga”.
“JJM chongmode nokantina ringna namgipa chiko on·anisan ong·achim indiba JJM-ni bang·bata kamrangan matchotgija galchipe dongenga aro contract ra·giparang, kam choligijagipa chi tank-rangko aro chi pipe-rangna contract on·taie kam ka·anichi bang·a songrangon cha·bokari dongenga,” ua agandapaha.
Ma·mong krorni kror tangka-paisarangko chamatgipako cha·boke cha·enga, ‘‘Nokantina ringani chiko on·a mission-ni scheme ong·a. Jendakode maming tik ong·gijagipa kamrang ong·jana gita aro namgni ong·na che·em che·em report-ko on·china bi·e PHE department-rangko nangni ge·etaniko man·a Deputy Commissioner-rang gita district ge·entina RTI-ko on·aha,” ua aganaha.
“Tik ong·gijagipa kamrangni bidingo songni manderangba uamangni badi ka·anirangko SDO/Executive Engineer-rangna on·a nanggen aro badi ka·ani kinggipin lekkako nangni ja·ku de·anina nangna watatgen,” ua aganaha.
Bang·bata songrangon kam ka·anirang aro nokdang ge·antiona chi pipe-rangko sale on·ani kam matchotgijaan kamrang matchotaha ine matchotani reprt-o soi ka·china songni manderangko draaeng, ua aganaha.
“Nokdangrang ringani chirangko man·jani a·selo ua scheme cha·bokanisa ong·skaenga. Indake an·chingni Prime Minister Narendra Modi-ni niksamsoaniko aro nokantina ringani chiko on·a uni gisik nange ja·ku de·aniko pe·na jotton ka·ani ong·enga,” ua uarangko nirokna nanggipa ong·e uko nirokchina minister-ko aganaha.