SHILLONG: Re·anggipa Sonibar walni 10:00 bajimango, bolchi rikgipa Shillong Bar Association-ni nokko wa·al kamahani gimin wa·al kamani a·selko ma·sina gita East Khasi Hills a·jani District Magistrate-chi magisterial inquiry-ko dakchina ge·etaniko on·ataha ine Sombar salo, a·dokni Chief Minister Conrad K Sangma parakataha.
Fire & Emergency Service IGP-ni on·gipa preliminary report-ni bidingo Assembly-o parakatengon, ia noko bijoli silitingni jrongange dingone dongako Shillong Bar Association-ni peon saksa nikahani gimin ia bijolini a·sel wa·al kamahakon ine chanchichipenga ine Chief Minister talataniko on·angaha.
Ia noko donggipa manderangni simsakgijani a·selba wa·al kamna man·a ine janapatengon, “Preliminary investigation report-o parakani gitade, darangba ia nokko wa·al kamanio sina ba saknaanirangko man·jaha. Ia nokko wa·al kamani bidingo Sombar salo sandirokenba, sorkarina chu·gimik report-ko on·ahaon, maini a·sel wa·al kamachim aro baditana kingking noksan ong·na nangahachim, ukode tale ma·sina man·gen,” ine Chief Minister parakataha.
Chief Minister-ni talataniko on·ani gitade, Shillong Bar Association-ni nokko wa·al kamenga ine Sonibar walni 10:15 bajimango Shillong-ni police control room, koborko man·sochengaha aro uandaken 10:16 bajimango Burra Bazar-ni Fire & Emergency Station-ni wa·al kimitgiparang re·angchengaha aro 10:20 bajimango wa·al kimitgipa gnigipa dolko ua biapona watataha.
Wa·al kamenggipa biapona sokangon, ia nok gimikkon wa·al kamgopengaha ine nikahani gimin ja·mano Shillong Fire & Emergency Service (F&ES) baksana samba jolo donggipa F&ES-rangni dakchakanikoba bi·ataha ine Sangma aganaha.
“Wa·alrang namen bilakahani gimin sambao donggipa CJM Court aro gipin nokrangnaba kenchakani ong·enga ine nikenba ta·raken, wa·alko kimitna a·bachengataha,” ine ua aganaha.
Wa·alni giproroanganiko champengna gita wa·al kimitgipa dolrang, biap samgittamchipakni chirangko sate wa·alko kimitna jotton ka·aha aro kontabrini gisepon wa·alko kimitna man·aha ineba Chief Minister parakataha.
Wa·alko kimitanio gimik doldok wa·al kimitgipa dolrang kam ka·aha ine janapatengon, Shillong Municipal Board-ni gitaba tengki 45 chirangko on·e wa·alko kimitanio dakchakanirangko on·aha ine Chief Minister parakataha.